Ka Hill Farmer’s Union, Thadlaskein Block Unit, West Jaintia Hills District da yoh ko wow pynskem ya ka Unit wa thymme yong ka ha Mukhla Nongrim ha ka 9 tarik uni u bnai. Ha kani ka sngi da wan wow pynskem ya kani ka Unit wa thymme ka HFU da u President wa Secretary ka HFU Thadlaskein Block.
Neiliang u President ka HFU Thadlaskein Block u Mutshwa Thabah, ha i klam mait phang, da e khublei u ya ki warep ka Mukhla Nongrim kwai da chimkhia wow yakit yabah lang ya ki para warep wei kiwa sñiawthooh leh wow em da ka kynhun kawa khlan wa i ya krehlang i wow ye u jop ya iwa eh wa ki warep yachem ki.
U Secretary yong ka HFU Thadlaskein Block u Chanbor Rymbai, da puræ u ya ka riti krhekaam yong ka seiñ wa ki kyndon wa kiwa yahkhamt yong ka seiñ toh u bood kryntih ki katkam ki phang krehkaam ka Hill Farmer’s Union. Da kyntu u ya kiwa yahkhmat wow man kiwa kreh chitom wei kiwa smat wow yarap para warep ha kiwon kiwon ki khep wa ki warep yachem ki.
Kiwa kitkaam ka Hill Farmer’s Union Mukhla Nongrim Unit toh u Janra Sari-President, u Kor Sari-Vice President, u Supplyme Sari-Secretary, u Hammylling Sari-Assistant Secretary, u Hamthaba Suna-Treasurer wa ki Executive Member wa kynthup ya u Iadron Sari, Likton Talang, Chalanki Sari, Sor Sumer wa u Roland Sari.
Chwa wow pynkut ya ka yalang da yoh ya ki kyntien sneiñ kyntien kroo wa i kitbok kitrwiang na u President ka HFU Thadlaskein Block.
