Pynkha chnat thymme ka JNC neibynta ka West Jaiñtia Hills District

Ka Jaiñtia National Council (JNC) kam chibynta wow pynyaar wei pynkhlan yei krehkaam, ynne ka sngi da yoh ko wow pynkha yaka Western Zone neibynta ka West Jaiñtia Hills District.

Ha kani ka yalang da wan wow chimbynta wow pynskem wei wow pynsmai ya kiwa yahkhmat yong kani ka Zone da u President wa khliehdooh ka seiñ, u Sambormi Lyngdoh deiwa emlang leh u General Secretary CEC, u Wanshwa Suting, ki Vice President, u Ency Shadap, u Nangjan Dkhar, u Asst. Secretary CEC, u Allmiki Ryngkhlem, u Publicity Secretary CEC, u Mebanteilang Sukhlaiñ wa kiwi kiwi kiwa yahkhmat ki Unit, ki Circle wa ki Zone ka JNC wei yaka yalang da pynlai da u Mehi Rymbai, Arts & Culture Secretary.

U Sambormi Lyngdoh hawa e yei klam da e mynsien u ya kiwa yahkhmat yong ka Western Zone wei da ong u wa kam kiwa yahkhmat toh u skem ki ha ka yurim wei wow em leh i chaniah wei wow maya uwi ya uwi khnang yow ye u pyntyllung ya ki kaam wa e chakri wa paka wei deiwa maya yaka ri wa ki jaitbru yong i.

Da ong u leh wa ka West Jaiñtia toh kawi na ki District wa em ya kiwa da stat wei em ko leh chiboon kiwa e yei chakri ya ka Ri-loom Jaiñtia kawa maya yong ki. Kamtæ da pyn-eh-daw pyn-eh-nasib u ya kiwa yahkhmat kani ka chnat wei kam kiwa stat toh u pynemkaam ki ya ka ha kiwa boon ki dawbah yong ki jaitbru.