Ka Jaiñtia Student’s Movement (JSM) Central Body ynne ka sngi da pynkha ko yaka Unemployment Cell neibynta wow mih ka JSM chakhmat yow pynyoh kreh yaki khon ka Ri-loom Jaiñtia kamjooh yaki khon ka jylla Meghalaya.
Haka yalang ka Central Body da em u President Rangbah ka JSM u L. Rymbai kamjooh u General Secretary Central Body u R. Dkhar.
Neiliang u President ka JSM-ER u Shnalad Rymbai haka yalang ka CEC ynne ka sngi da ong u wa ka JSM hi da boon wa yoh ko u thap kreh yaki bru yong i, wei ym toh iwa eh ya kiwa dang chong yung neibhah kam i lai luti ka JSM da chem ko chiboon ki khih ki khan wa ki nong Meghalaya wa ye ki u khih u kreh haka jylla yong i, wa ym emkaam u lai khih lai kreh cha baar jylla.
Da ong u leh ka JSM lyngba ka JSM-Unemployment Cell daw ye ko u pynyoh myntoi chiboon yaki khon ka Meghalaya wei wow sñiawbha ki wow kynjoh ktien cha ka seiñ yow yoh yei yarap.
