Jowai: Ka seiñ Meghalaya People United Front ynne ka sngi da ye ko wow nang pynkrai chooh chooh yaka chnat krehkaam yong ka hapoh Ri-loom Jaiñtia heiwa da ye ko u pynskem yaki dkhot krehkaam wa pura yong ka ki wow pait yaka East Jaiñtia Hills District waroh kawi haka yalang wada pynman haka Community Hall ka Khliehriat West.
U Kyrshan Blah, President ka MPUF East Jaiñtia Hills District, kular u wow chimkhia neibynta ka imlang sahlang khamtam heiyatoh wa ka roi ka paar hapoh East Jaiñtia deiwa ong leh wa dang em chiboon i duna katwa toh ka District wa dang lung.
Ka thong wa hakhmat booh u toh yow dawa yaki thaw sumaar næ Hospital hapoh ka District, wei u lai yaklam waki Company waphær waphær yow yoh khih yoh kreh ki khynroo khyllood ka thaaiñ wa boon kiwa khlem khih khlem kreh.
Neitæ u booddien u leh yaki kaam wa sahteiñ wa da leh u nadooh i por wa man u kam u President ka Khliehriat Circle, heiyatoh waka Memorandum wa da li booh u ha JHADC neibynta u kynreh Trading License ya ki bar jylla wa kiwi.
Khana u wa nachwa heipor wa man u kam u President ka Khliehriat Circle pait u du kat ka Circle donhi. Yooluti u wa kattu won daw ye u wow e i chakri wa rap bha ya ki paidbah neibynta u wanrah i roi i paar haka East Jaiñtia Hills District.
Da emlang ha kani ka sngi u Justine Dkhar, MLA warim ka Khliehriat kam u kongsan, u Finelyness Bareh MDC ka Rymbai Khliehriat kam u symbood kongsan, wei hawa e ki yei klam kyntu ki wa kam ki seiñbhalang toh u ri yei akor burom, u man kiwa kut yumut wow chakri yaka ri waka jaitbru. Wym hoi u sarong tangwa u ap leh yei e yumut kiwi, u ya sñiawthooh yumut yow ye pynku yaka seiñ, nalor wow sñiawtre yei kaam wei kreh dei khooid mynsien.
Yaki dkhot wa pura ka MPUF East Jaiñtia Hills District da pynskem da u Dapoiwanmi Laloo, President MPUF Central Body kiwa man kamni- U Kyrshan Blah kam u President, Vice President u Prakash Shylla, General Secretary u Kmenlang Siangshai, Publicity Secretary u Riki Shylla, Sport Secretary u Onikson Dkhar deilang wa 16 ngut ki dkhot.
Ha kani ka sngi da emlang leh kiwa yahkhmat yong ki seiñbhalang waphær waphær, ki manbei manpa wa kiwi.
