Ka sorkar Assam ynnin da pynkhai im biang ko yaka yalehke pynwyrngia yadaw masi kawa da man leh kam ka riti dustur kawa tip kam ka Moh-Jui hadien 9 snem wa khang ka Supreme Court ya ka Jallikattu (yadaw masi) ha Tamil Nadu waka Bullock Cart Race ha Maharashtra.
Ka yadaw masi ha Assam toh kawa da sdang da u syiem Ahom uwa tip kam u Swargadeo Rudra Singha 200 snem nachwa.
Yei sdang biang ya ini i yadaw masi da wan wow sakhi da u Montri Rangbah ka Assam, u Himanta Biswa Sarma uwa da ong wa kani man ko leh kam chibynta ka lehkmen Bihu nadooh yong rim wei sñiawkmen u wow yoo wa da pymim biang ka hadien 9 snem.
I daw wa da yoh u sdang biang ya kani ka yadaw masi toh hadien wa ka Supreme Court da pdiang ko yeiwa da pynkylla ha ki aiñ ka Tamil Nadu, Maharashtra wa Karnataka deilang waka aiñ Prevention of Cruelty to Animals (PCA) Act, 1960 heiwa da chah wow psan ya ki masi du wow chimbynta haka Jallikattu, Kambala wa ki Bullock Cart Race.
Ka Gauhati High Court ynnin u snem da phah ko leh yaka sorkar Assam wow pynche ko kammon yieñ ko hajrong ini i kaam heiwa ka sorkar da pynkhreh ko da ki kyndon wa khor wei kiwa bniah yow pyntikna wym yap wei ym mynsoo ki masi.
Wei kini ki kyndon waroh hap wow bood thij hawa pynman yei yadaw masi.
Discussion about this post