Ka umchangpet kawa da ieh khlem pynkemkaam ha chnong Khlookynrien, Laskein C&RD Block, West Jaiñtia Hills District da pynkhai im biang ya ka da ka Aroh Foundation kawa em hapoh HDFC Parivartan deiwa ya krehlang waka Indian Water Partnership (IWP) wei da e kti cha ka chnong wow pynemkaam ha ka 3 tarik uni u bnai.
Ha i thaw wa mih kani ka umchangpet siang khyndawbilat kamjooh da chna ya u dooid wow kit ya ka um cha ka top um yow pynlang yow ye u pynemkaam ha ki lyngkha kamjooh ki kaam yung.
Ha ka yalang wow e kti ya ka kani ka umchangpet cha ka Spring Water Committee ka Khlookynrien, da emlang u Taiwanyo War (Divisional Soil & Water Conservation Officer, Jowai), u Patrick Lamare (Range Officer), u Bhabani Shankar Nayak (Project Manager, Aroh Foundation), u Spainki Niang (Agriculture NRM Expert) deilang u Waheh Chnong, u General Secretary wa ki Executive Member ka Dorbar Chnong.
Neiliang u Spainki Niang hawa e yei klam da ngait skem u wa ini i ye u pynkhai im ya ki tyllong um kiwa da chah ieh daw yarap bha ko ya kiwa chong chnong wow pynim leh ya ka rep ka riang kiwa da ieh da boon snem neidaw wym yoh um lane wa duna um.
