Ka Hynniewtrep Border Dispute Redressal Forum (HBDRF) da pynsñiaw ko cha ka sorkar hajrong i thmu wow leh embor ki Karbi ha khappood kawa em ha Khanduli, wei i thmu ki Karbi toh wow pynkhai im biang ya ka Entry Tax Gate ha Khanduli wa ha Block-I.
Neidaw wa kiwa yahkhmat ka HBDRF ym yoh laad ki wow yachem wa u Montri Rangbah ynne ka sngi, da e kti noh da ka chithi yow pyntip yei eh ki paidbah ha khappood.
U Chairman ka HBDRF, u Chandame Sungoh da ong u wa ka Forum da kdaw ko ya le tylli ki phang haka chithi wa kynthup yei pynkhai im biang ki Karbi ya ka khyrdop chim dan lyngba ka Socheng Amreng Border Development Committee (SABDC).
Da ong u nachwa hadien wa ka KAAC da pynyieñ ko ka khyrdop da dep mih i ya kynaad heiwa ki da sai da kynjroi ki ya kani ka Signboard wei da dep wow pyndooh ka deiwa yaklam ki ar sorkar wei da em leh i yaklam yasuk, tangwa kattæ won da em i dawa pynim biang ya ka khyrdop chim dan ha thaaiñ.
Chooh chooh da pyntip wa lyngba ka SABDC, da dawa wa kitu ki Pnar kiwa em lyngkha cha Karbi toh u Register smat ki yei thaw wa ka Karbi Anglong Autonomous Council (KAAC), wei ini daw ktah ko chiboon ya ki paidbah ka thaaiñ kamjooh ya ka jylla.
U Chandame da khana u wa kawi won ka phang toh yei chah tynyap khiar u Tellme Talang, heiwa yeiwa dang sah i yong oo da chem chajan ki chnong Karbi, wei neiliang ka Forum da dawa ko na ka sorkar wow thung da ki bru takit wei wow e yarap cha kiwa ha-yung ha-sem uni u bru.
Discussion about this post