Jowai: Ka Dorbar Chnong Ladmukhla, West Jaiñtia Hills District da pyman ko ya ka pynkhooid chnong ynnin ka 2 tarik yow pynman ya ka chnong ka thaw wa khooid wa jngiar yow lait nei sma na i jakhlai khnang wow yoh ya ka la-ær wa khooid.
Da sdang ya ka pynkhooid chnong nadooh 8 waje i step hadooh 2 waje i sngi heiwa da mih paidbah kiwa chong chnong chynrang wa kynthai yow pynkhooid ya waroh soodong ka chnong wa i bynta u Sarokbah NH-44.
Hadien wa pynkut ya ka pynkhooid chnong, da pynman ya ka yalang hapoh ka Dorbar Hall ka chnong wei da yoh ya ki kyntien sneiñ kyntien kroo na kiwa yahkhmat ka chnong kiwa da kyntu ya ki paidbah wow man ki kiwa lehkhooid ha yung ha sem wei hapoh ka chnong ka thaw hi waraoh kawi.
U Ebormi Lyngdoh u Waheh Chnong ka Ladmukhla da e khublei u ya ki paidbah wa smat mih ki u krehlang waka Dorbar Chnong wow pynkhooid chnong wei da kyntu u leh ya ki wow man ki kiwa yatylli wa kiwa yatoh yumut uwi wa uwi khnang wa ka chnong ka thaw u nang ku ko.
Discussion about this post