Jowai: Kamwa jooh leh khlieh u snem haka sngi kha u pa ka ri India u Mahatma Gandhi ka 2 tarik u Naichiphaw kawa man leh ka sngi chuti ha waroh ka ri, boon naki chnong ki thaw chim ki wow pynkhooid yaki dong ki chnat, ki yaw ki haat, kamtæ ha Jowai leh da sakhi wa ynne ka sngi da em i pynkhooid ya ki yaw ki haat.
Haka Iawthymme wa em ha Ladthadlaboh, Jowai kawa mantre daka District Council, da pynman yei pynkhooid yaw daka dorbar chnong Dongmihsngi chirup i ya chimbynta lang ki bor ka District Council, kiwa chongdai wa ki paaid wa chong chnong kynthai wa chynrang.
Hei yaklam wa u Waheh Chnong ka Dongmihsngi u Herperly Shullai, da khana u wa yeini i pynkhooid yaw neiliang ka dorbar chnong jooh pynman ko khlieh u snem ha kam kani ka sngi deiwa yoh bor naka District Council. Hu uni u snem kani da man ko leh chibynta ka prokram yow pyndooh pyndam ya u khñiang kjut COVID-19 deiwa pyrchang ki katwa ye u pynneh yei khooid i jngiar khnang wa i kjut i chitom u wiar ki.
Da ong wa heipor wa sdang chem chitom bha ki u pynsñiawthooh ya ki paidbah hajrong ki kyndon ka chnat i chait i khiah khamtam ya kiwa wan yaw, tangwa dei ya kreh chitom ki Volunteer ka chnong won yoo ki wa da em i sñiawthooh haki paidbah wa kammon u yada yei pran samen lada wyrchaw waki por nachwa.
Ha kani ka sngi neiliang ka kari tympleh diñ leh da wan siat um ko ya kani ka yaw wei neiliang ka dorbar chong leh da siat dawai pynyap khñiang ko yaka thaw wa man yaw.
Neiliang ka T. Bamon ka sahep yong ka District Council kawa pait yaka yaw da e khublei ko yaka Dorbar Chnong Dongmihsngi wa kynthup yaka Market Committee, ki Volunteer wa kiwa chong chnong kynthai wa chynrang wada chimkhia ki khlieh u snem wow ya pynkhooid ya kani ka yaw.
