Ka Moolamylliang Biodiversity Management Committee (MBMC) deiwa ya krehlang waka Moolamylliang Upper Primary School waka Moolamylliang District Council Lower Primary School, ynne ka sngi da chibynta wow kynmoo warom ya ka International Day of Action For Rivers deiwa pynman yei pynkhooid ya ki rood ka Wah Kwai kawa em hapoh ka chnong.
Ini i pynkhooid ya kani ka wah toh neidaw waka wah da e myntoi ko chiboon ya ki tre chnong wa kiwa na baar chnong leh kamjooh khamtam ha i por tlang wot lada da sih ko tangwa kiwa boon dang pynemkaam ki ya ka khamtam ha ka rep ka riang, i sum i sait, i kaam sait kaam khlieñ wei psa ko leh ya chiboon kiwa im ha tymbud kani ka wah.
Hapyrdi i yoh yarap na kani ka wah tangwa i wym sñiawthooh wow sumaar da kiwa boon kiwa pynemkaam ya ka, da leh jakhlia ki deiwa pyntooid ka um Acid, i noh roi yei jhep wa ki Plastic tymbud i rood ka Wah Kwai .
Ha kani ka pynkhooid namo ka Cleaning Drive da sdang da i klam maitphang da u D.L. Rymbai, Chairman, MBMC deiwa emlang kiwa sikai wa ki khynnah skur yong ki ar tylli ki skur wa kiwa kitkaam yong ka chnong.
“Ka MBMC u nang pteiñ ko wow yarap wow pynneh pynsah wow pynkhooid pynbha ya kani ka Wah Kwai deilang waka Dorbar Chnong neibhah wa kani ka wah man ko kawa emkaam ha ki por wa nachwa tangwa hei lai i por kat dang mih ki sngi, i naam yong ka da wiar i tangwa daw pyrchang wow pynim biang ya ka,” da u Appor Dkhar, Joint Secretary ,MBMC hawa e khublei ya kiwa chimbynta waroh.
