Nartiang: Ynne ka sngi kamwa 100 ngut ki dkhot ka National Service Scheme (NSS) na ki artylli ki kolej na chnong Jowai, ka Kiang Nangbah Government College waka Thomas Jones da hiar ki cha ka chnong Nartiang yow li pynkhooid ïa ka Iawmulong i thaw wa em ki Moopynyieñ iwa da yoh leh i naam ‘National Importance’ iwa da e da ka Archaeological Survey of India hapoh ka aiñ Ancient Monument and Archaeological Sites and Remains Act, 1958.
Ha chwa u pynkhooid ïa ini i thaw da chem wa man i iwa da kup da tymmoh da ki phlang ki ranem khamtam ïa ki luti hapoh kani ka kpær.
Kamwa ar kynta kini ki khynnah puræ deiwa ksoh ki saroo, ki wait wa ki khoh yow pyllang jhep da ye ki u pynkylla dur ïa ini i thaw hadooh wa da ye u ong wa da man ko kam kawi na ki thaw wa pawnaam ym du hapoh Ri-Loom Jaintia tangwa ka ri India hi waroh kawi. Ynne ka sngi da booh leh ïa ki tin pyllang jhep ha i thaw psiah cha ini i thaw.
Ki dkhot ka NSS yong ka Thomas Jones College ha uni u snem da dep pynman ko ia kiwi tawan ki kaam kam i e sikai hei yatoh wa i kjut HIV & AIDS hapoh kolej ha u Naiynru, i e snaam sñiawbha ha u bnai Naiynñiaw, i pynkhooid thaw booh kari ha khmat yong ka kolej wei da saam ki ïa ki synduk pyllang jhep cha ki dukan wa hajan ka koleg, da dep pyllait symbe dakha ki leh ha ka wah Poh Pynthor ha ka chnong Pynthor Langteiñ kamjooh leh da pynkhooid ki ïa kani ka chnong. Hapoh kani ka jooh ka chnong ka Thomas Jones College da dep chna ko ïa ka luti lai kjat (Footpath) iwa jrong hadooh 60 mitar.
Kam wow pynkynmoo heini arngut na ki dkhot iong ka NSS yong ka Thomas Jones da dep chah jied ki ha uni u snem u chimbynta ha ka ‘Republic Day Parade’ wei da pynkup ha ki ïa i naam ‘Best Volunteer’ da ka NEHU.
Discussion about this post