Jowai: Ka AJYWO Central Body, katkam ka RTI, da chem ko wa em du 1264 tylli ki Trading Licence yong ki Non-Tribal kiwa da wan pynthymme ya ki Trading License yong ki ha Ri-loom Jaiñtia, wei ka JHADC da yoh lum khajna ko hadooh kamwa T. 1,21,13,652 na kini.
Kini ki Non-Tribal kiwa da yoh Trading License kiwa seiñ khih ha ki chnong ki thaw man ki kamni ha wah:
Byndihati-1, Chiehruphi-7, Caroline Colony-1, Dawki- 3, Dkhiah East-32, Dkhiah West-6, Ialong-2, Iawmusiang-59, Khliehriat-17, Khliehriat East-78, Khliehriat West-116, Ladrymbai-11, Ladrymbai B-158, Ladrymbai Datsimpein-102, Ladrymbai Dongwah-85, Ladrymbai Khliehdupon-128, Ladthadlaboh-16, Lumshnong-41, Mihmyntdu-3, Mihmyntdu B-1, Mission Compound Jowai-1, Mookhep-1, Mookyrdup-1, Moolamylliang-6, Moopala-5, Muktapur-1, Musiang Lamare-7, Mynkre-25, Nartiang-2, New Hill– 32, Nongsning-10, Ratacherra-1, S.J. Road Jowai-1, Sookilo-21, Sunapur-1, Sutnga-1, Thadlaskein-1, Thangskai-45, Tongseng-9, Tympang Club-7, Umkiang-33, Umlaper-4, Ummulong-2, Wahiajer-1, Wapungskur-1, 7mer (Pasyih)-17, Phramer-43 wa 118 tylli ki Trading License kiwa yoh wow khayi ha boon tylli ki chnong na kawi ka License.
“I ym ye i wow pdiang wa em du 1264 ngut ki baar jylla kiwa khayi hadooh katni ha waroh kawi ka Ri-loom Jaiñtia. Cheiwon wiar ki Trading License yong ki boon boon hajar tylli ki dukan ki baar jylla ha Ri-loom Jaiñtia? I duna palat ki dukan Non-Tribal wa em Trading License pynyoo ko wa ka JHADC ym ye ko wow pynkrehkaam ya ka aiñ The Jaintia Hills Autonomous District (Trading by Non-Tribal) Regulation (Act), 2011”, ong u Reachingson Siangshai, Vice President yong ka AJYWO Central Body.
Ka seiñ da ong ko leh wa kini ki baar jylla kiwa em yaka Trading License ym em bood ki yaka kyndon (Rule) 9 yong ka ‘The Jaintia Hills Autonomous District (Trading by Non-Tribal) Rules, 2015’, kawa ong wa kiwa em License toh u wah ki yaka ha ki dukan yong ki, khnang wow tip yei em Trading License yong ki. Em iyi rei yi chadien wa ka JHADC ym chimkhia ko wow pynkrehkaam ya kani ka kyndon leh, khnang wa ki paidbah u tip ki yaka dukan kiwa em Trading License.
Ka seiñ da kylli ko wa kammon ym tip ka JHADC yei boon ki dukan ki baar jylla kiwa ym em Trading License ha Ladrymbai, Sookilo, Phramer, Khliehriat, thaaiñ War, Umkiang, Ratacherra wa kiwi kiwi ki chnong hapoh u pud u ang ka JHADC. Ini i yoh mon ki baar jylla wow khayi pyrchah aiñ wei laitlooid hapoh u pood u ang ka Ri-loom Jaiñtia da booh ko ya ki tre ri tre chnong ha i ma kawa khroo ha waroh ki liang.
“Ka AJYWO ka dawa joor ko naka JHADC wow khynra wow khang lut ya waroh ki dukan yong ki baar jylla ki wym em Trading License wei wow hukum ya kitu ki baar jylla kiwa em Trading License wow wah ki ha ki dukan yong ki yaka Trading License. Ka seiñ daw yachem ko leh wa u CEM yong ka JHADC wow e dorkhat hei yatoh wa kani ka kaam. Ka seiñ maham ko wow leh da ka PIL lada jia wa ka JHADC ym pynkrehkaam pura ko yaka aiñ wa toh u pait yaka khayi yong ki baar jylla ha Ri-loom Jaiñtia,” pynkut ka kyrwoh na ka seiñ.
Discussion about this post