Kam chibynta ka hukum u DC ka West Jaiñtia Hills District wow wai 20% ki dukan wa em ha Iawmusiang, ka yaw Chor, ka yaw chyiap, yaw Seiñraij wa Iawthymme, Ladthadlaboh ha ka sngi Monday, Wednesday wa Friday deiwa booh da ka pali.
Neiliang ka Dorbar Chnong Tympang Iawmusiang, Jowai da lai biah ko da ki Number 1,2,3,4,5,6 ha ki dukan heiwa ki Number 1 wa 4 u wai ki ha ka Monday, 2 wa u 5 ha ka Wednesday katwa kiwa yoh ya u 3 wa u 6 u wai ki ha ka sngi Friday iwa man leh katkam i hukum u DC.
Ka Dorbar Chnong da kyntu ko ya ki tre dukan wow sñiawbha u bood ryntih katkam wa da booh wei wow wai dukan katkam ka sngi wa toh u wai wa da thoh ha kitai ki Number khnang wa i kaam u man i iwa lai bait lai ryntih, yow lait u mih iwon iwon i klumar.
Myntu ka sngi Bibar u pyndep ya itai i biah Number, ki tre dukan chibet janmiet ye ki u la pait jar jiar ki dukan yow tip ki ya ka sngi wa toh u wai dukan ki.
