Pynkhreh ka sorkar wow pdiang ya ka National Games wow man ha Shillong wa Tura: Conrad

Jowai: U montri rangbah ka jylla, u Conrad K. Sangma ynne da ong u wa ka sorkar chimkhia bha ko wow kyntu kynrong ya ka kaam yalehke sports hapoh jylla kam chibynta wow pynkhreh ya ka National Games 2022 ha Shillong wa Tura, kam ka Co-host City.

Yeini da klam u ha ka sngi pynkut ya ka Tura Football League 2018, heiwa da ong u, “Ka Draft Sports and Youth Policy dadep pynkhreh ya ka wei ym slem de daw pdiang noh ya ka da ka dhab ki montri. Da pynkhreh bha i wow pdiang ya ka National Games wei sah wow chim i ya ka rai wa khaddooh hajrong wow pynman ya kani ka lympung yalehke sports wa heh dooh ka ri.”

Da pyntip u wa da chna ya ki Stadium, ki Games Village wa kiwi kiwa emkaam wow pdiang ya kani ka lympung.

“Deiwa chim kabu ya ka National Games daw ye i wow pyntikna wa waroh ki jait yalehke sports u sdang ki hapoh Meghalaya i wow kyntu kynrong ya ka kaam yalehke.”

Related posts

Kut noh ka 1st Shangpung Veteran Badminton Championship

November 29, 2024

Super Division Saipung: Jop ka Jalaphet Bri Sumer wa Pyrdung

November 29, 2024

“Ka Meghalaya mahajon bha ko wow pynku ya ki kaam yalehke sports wei u pyntikna i wa ki khynroo khyllood u ye ki wow pynyoo ya ka sap yong ki,” da ong u Conrad.

Da yaroh u leh ya ka District Football Association Tura (DFA) wa ye ko u pynman ya kani ka lympung Tura Football League la ynru sien kattu.

U montri ka chnat yalehke, u Banteidor Lyngdoh ha ki kyntien wa da phah da ong u wa kani ka lympung daw yarap ko wow wanrah yei chait i khiah wei wow chem ya ka sap wa em ki khynnah khynroo khyllood. Da pynrap u leh wa lyngba ka Football daw ye u yoh ya ki Brand Ambassador ka Meghalaya.

Ha ka yakhun Final, ka Boca Juniors FC da jop ko ya ka Super Division deiwa pynrem ya ka Druma Sandruma SC da 1-0.

Kani ka lympung da sdang ko ha u Khonchonglad (November) heiwa ki yakhun da man ki ha ki le bynta (levels) – Division B, Division A wa Super Division. Ha ka Division B da jop ka Rongkhon Sports Association katwa ha ka Division A won da jop ka West Balalgre Club.

Ha kani ka sngi pynkut da wan sakhi da kamwa 5000 ngut ki bru.

Da saam leh ya ka song poisa cha ki dhab da u Co-Chairman Meghalaya Planning Board u Billikid A. Sangma wa kiwi kiwi ki heh ka DFA.