Ka Joint Action Committee War Jaiñtia wa kynthup yaka seiñ WJSU, FKJGP War Jaiñtia waka HYC War Jaiñtia, ha ka 29 tarik uni u bnai da chong yalang jhan ki ha Amlarem hadien wa da phah dei thoh pynkynmoo biang yei e por (Deadline) wa dadep e ki cha ka Land Port Authority of India, New Delhi heiyatoh wow beh næ kyrriah noh ya u Manager ka Dawki ICP hapoh 15 sngi.
Ha kani ka yalang yachem yumut da rai ki wow pynkhreh da ka yakhih la jia wa ka Land Port Authority of India dang suki bait ko yeiwa da thoh pynkynmoo wa khaddooh yong ki wa da phah ki haka 28 tarik uni u bnai deiwa e por hapoh 15 sngi.
Ha kani ka yalang da emlang kiwa yahkhmat nadooh u S. Syngkor, Vice President wa u Everest R. Langstang, General Secretary kiwa naka seiñ WJSU, u Bahshlur Mukhim, President wa u Namdichai Lamare, General Secretary kiwa naka seiñ FKJGP War Jaiñtia, u Youdahunki Shylla, President wa u Tohmondiam Mukhim kiwa naka seiñ HYC.
Ha kani ka yalang da chim ki leh yei rai wow thung ya u Bahshlur Mukhim kam u Chairman ka JAC wow pynlai yalang ya ka JAC neibynta 4 bnai itæ toh nadooh ka 01-11-24 hadooh ka 01-04-25.
Da rai wow thung ya u Alban K Gashnga kam u Chief Adviser ka JAC wei heijooh i por kam u Non-Executive Spokesperson ka JAC.
Da rai wa hapoh kini ki 15 sngi kam i pynkhreh yakhih wow kyrriah ya u Manager ka Dawki ICP, daw khut yalang yachem yumut ki ya ki waheh chnong wa em soodong sookun ka Dawki ICP, wow khut yalang ya ki Association ki Exporter wa ki Owner & Driver Truck Association, ki Dolloi ka Elaka Darrang wa Nongtalang wa kiwi.
Ka JAC kyntu ko leh yaki paaid ka thaiñ wow yaksohkti lang ki u kyrchaan hajrong i dawa beh ya u Manager ka Dawki ICP wa wan leh tre khlieh cha kani ka thaaiñ.
Discussion about this post