Neidaw wa joor i tih moo, tih khyndaw, tih chyiap kiwa man pyrchah yaka aiñ khamtam ha ki chariñ loom wa na ki wah wa em ha East Khasi Hills khamtam ha Sohiong, Mawblei wa Umphyrnai iwa da ktah ya ki um ki wah wa em ha kani ka thaaiñ.
Hajrong ini, neiliang ka DC ka East Khasi Hills District da ong ko wa ka National Green Tribunal, Principal Bench, New Delhi da khang ko ya uwon uwon næ kiwon kiwon wow leh ya kini ki kaam tih moo, tih khyndaw, tih chyiap na ki um ki wah ha kiwon kiwon ki bynta ka ri khlem da yoh yaka Mining License/Quarry Permit wa kiwi ki Clearance Certificate katkam wa da phah da ka Ministry of Environment, Forest and Climate Change ka sorkar India deilang waka EIA Notification 2006 wa kiwa da pynkylla na ki por cha ki por ki kyndon.
Kamtæ da ong wa kini ki rukom tih da ktah ko ya ki um ki wah wa em cha tre ki loom kamjooh ki thaw rep, ki doh um hadooh wym hoi de u dih yaka um wei wow pynemkaam ka da ki bru.
Deiwa bood yaka hukum ka NGT hapoh ka East Khasi Hills yow yada yei mynsien bru, i man chngaaiñ, i chait i khiah wei wow yada yaka rym-aw, neiliang ka DC da pynkrehkaam ko da ka Section 144 CrPC yow khang ya ini waroh i rukom tih wa man pyrchah aiñ khlem da yoh bor chwa katkam ki kyndon ka aiñ hapoh waroh kawi ka East Khasi Hills.
Discussion about this post