Pynksan ka HC ya u Pyndap kam u president ka KHNAM, ye u chah kyntait u THS Bonney kam u kyrtong MP

Shillong: Ka yung kasari Meghalaya High Court da pynksan ko ya u Pyndapborthiaw Saiborn kam u President ka Khun Hynniewtrep National Awakening Movement (KHNAM) ha ka rai wa da pynmih ha ka 7 tarik uni u bnai.

Kani ka rai ka High Court ye ko wow ktah ya u kyrtong MP wa sai da ka dhab, u Adelbert Nongrum ha i pyrtuid ka KHNAM, wot hadooh wa ye u wow chah pyndam yei man kyrtong neibhah ka dhab yong u Saiborn da phah ko leh da ka dorkhat cha u Chief Electoral Officer (CEO) wa u Returning Officer kiwa ye wow bichaar ha ka Scrutiny ynne ka sngi.

U Pyndap hawa yaklam wa kiwa pathai khubor, da ong u wa ka dhab yong oo da ujor ko pyrchah ya u Adelbert Nongrum cha ka Election Commission of India (ECI) hadien wa da kam u wa man u president ka KHNAM ha ka General Council kawa da man ha ka 6 tarik u Naisaphra u snem wa dadep.

“Ha ka 7 tarik u Thohlakhmi uni u snem ka Election Commission da klam che ko wa man ko ka kaam pohyung ka party, wei emkaam wow pynbait yeini hapoh ka party namo wow lai cha ka kasari,” da ong u Pyndap deiwa pynrap deiwa ong wa ha kitu ki por i kwah i wow pynsmat u pyndep ya ki kaam tangwa ka liang ki yong u Adelbert da pyn-eh ki deiwa ong wa da tipmit ya ki da ka Election Commission, katwa kamtæ da lai noh cha ka High Court ha ka 19 tarik uni u bnai wei ha ka 20 tarik ka Kasari da pynmih ko ya ka hukum wow pynneh ya oo (Pyndap) kam u President ka KHNAM.

Related posts

Dang jan u lai na Shillong cha Vietnam, Thailand, Laos, Cambodia wa Burma bar cha Delhi: Conrad

November 14, 2024

Pynbna ka VPP ya ki kyrtong MDC ha ka JHADC wa KHADC

November 13, 2024

Hawa jubab, da ong u wa u THS Bonney ye u wow chah kyntait kam u kyrtong MP neibhah ya ki Form (a) wa (b) wa da soi da u Adelbert kam u President ym krehkaam de hadien wa ka Kasari da pynmih ko ya kani ka hukum.

Da ong u wa da phah dorkhat leh cha u CEO wa u RO wei da ong wa ki dang yaklam ki wa ka Election Commission hajrong kani ka bynta wei chong ko ha ka rai yong ki wei lada leh pyrchah ki ya kani daw ujor kylla ya u CEO wa RO.

U Pyndap da ong u leh wa ka Election Commission ymye ko wow lai lait na ka hukum ka Kasari, lada leh pyrchah ko pynyoo wa tyngkheiñ ko ya ka hukum ka High Court.

Chooh chooh u Pyndap da ong u wa ka KHNAM hi ym pynyieñ kyrtong ko neibynta ka Election MP wei wa u Bonney em u hei maa wa ye u wow chah pyndooh wow yakhun kam u kyrtong MP.