Shillong: Ka Meghalaya High Court da pynksan ko ya i bor u Chief Executive Member (CEM) ka Khasi Hills Autonomous District Council (KHADC) heiyatoh wa i thung ya ki Executive Member (EM) wa Deputy CEM wei da phah ko leh ya ka yunhkrehkaam u Lat ka jylla wow tipmit ya ki pyrtuid wa phah da u CEM.
Kani ka hukum da mih ko hadien wa u CEM ka Khasi Hills Autonomous District Council (KHADC) u Latiplang Kharkongor da ujor u ha ka yung Kasari hajrong i pynslem ka yungkrehkaam u Lat ka jylla wow tipmit ya ki EM wa Dy.CEM wa da phah hadien wa da chah jied u (Latiplang) ha ka dorbar ka Council ha u Khonchonglad 2019.
Hawa e ya ka rai ynne ka sngi, u Chief Justice ka Meghalaya High Court, u Mohammad Rafiq da ong u wa katkam ka Rules 1951 da klam che ko ya i chna ya ka dhab ki montri namo ka Cabinet ka sorkar, da pynpsiah leh ya kiwa boon ki kyndon khamtam ka Rule 20, kawa klam che wa man i mon laitlooid u Chief Executive Member wa jied ka Council wow jied namo thung ya u/ka Deputy Chief Executive Member wa kiwi ki EM ka Executive Committee yong ka District Council.
Ka Kasari da ong ko wa u Lat toh u thung u ya u bru namo ki bru katkam i jied u CEM wei kani ka kyndon sariem ko wa ka Article 75 ka riti synchaar ka ri kawa e ha i mon u Prime Minister wow tyrwa yumut ya u President wow thung ya ki montri sorkar wei katkam ka Article 164 ka riti synchaar, kawa sariem da pynkup bor ya u Chief Minister wow e yumut ya u Lat wow thung ya ki montri sorkar.
Ka High Court da phah ko ya u Secretary u Lat ka Meghalaya, Raj Bhawan, Shillong wow lai booh ya ki kot ki sla kiwa yatoh wa ini i kaam ha u Lat neibynta wow pynmih ya ka hukum.
Rap nachwa, u Latiplang da phah u yei pyrtuid ki soo ngut ki MDC ka Council cha u Lat ka jylla wow tipmit ya ki kam ki EM wa kynthup ya u Ronnie V Lyngdoh, u Mitchel Wankhar, u Lamphrang L Blah, ka Macdalyne Mawlong wa ka Dy.CEM ka Grace Mary Kharpuri.
Discussion about this post