Shillong: Ka Hynniewtrep Youth Council (HYC) da ong ko wa ym sñiaw yahaap ko tang khajak leh yeiwa pynbiej ka sorkar jylla wow booh da ki Entry wa ki Exit Point kam ka laad wow yada yei psiah ki baarjylla.
U General Secretary ka HYC, u Robertjune Kharjahrin da ong u wa i booh ya ki Entry wa ki Exit Point ym em yumut i iyi iyi leh neibhah ym em ka kyndon wow pynchitom ya kiwa psiah bakla neibhah kiwa kwah u psiah luti cha poh ka jylla da tip ki palat yeiwa tip ka sorkar ya ki laad ki luti. Hei yatoh won wa ka Falicitation Center kiwa thmu ka sorkar u booh ha ki Railway Station, ka seiñ da ong ko wa kani toh ki thaw wow pdiang sñiawbha ya kiwa psiah cha ka jylla.
Chooh chooh da ong u wa ka seiñ ka yieñ bait ko ha ka yurim wow pynkrehkaam ya ka Inner Line Permit (ILP) kawa man kam ka stieh wow yada yei psiah ki baarjylla.
Ki khyrdop yong ka sorkar da e laad chwa ki ya ki baarjylla wow psiah ki chapoh ka jylla wei lada ymbiang ki ya ki kot ki sla ym em ka kyndon wow pynchitom ya ki wei kammon u boodien won ka sorkar cheiwon lai cheiwon sah ki da ong uni u heh ka HYC.
Heijooh i por leh ong u wa burom ko yei rai ki 13 tylli ki seiñbhalang wow pdiang ki ya ki Entry wa ki Exit Point neibhah em ki ka yong ki hi ka rukom pyrkhat.
Iwa yaphær toh du ka yurim wa yieñ ka HYC wa ki 13 tylli ki seiñbhalang wei ki leh smat ki u yakrehlang wa ki yei bha i miat ka jaitbru.
Discussion about this post