Ka Election Committee of India ynne ka sngi da pyntip ko wa da pynku ya ka poisa wa ye ki kyrtong wow pynlut hawa pynman Election MLA wa MP deiwa pyntip leh wa yeini da dep pynku ha u 2014 wei da pynku biang da 10% ha u 2020.
Yow leh yeini da thung da ka Committee wa kynthup ya u Harish Kumar, Retd. IRS Officer, u Umesh Sinha, Secretary General wa u Chandra Bhusan Kumar, Sr. Deputy Election Commissioner ka Election Commission of India yow pynman yei thooh bniah yei lutsan wa kiwi ki kaam wa yatoh waka Election wei wow tyrwa kammon wow leh.
Ka Committee da khut ko leh ya ki seiñ saiñhima, ki Chief Electoral Officers wa ki Election Observers yow e ki yei buit yong ki heiwa ka Committee da chem ko wa da ku leh ki bru wa thap Vote kamjooh i dor ki mar ki mata nadooh u snem 2014. Da pyrkhat leh wa i rukom yalap Election toh katni iwa da poi ha ki rynsan ka Internet.
Kamtæ deiwa pyrkhat leh yei dawa na ki seiñ saiñhima wow pynku noh ya bai lutsan heipor yaleh Election wei neidaw wa ku leh kiwa thap Vote na 834 Million cha 936 Million ngut na u 2014 cha u 2021 iwa mut wa da ku da 12.23% wei da ku leh i dor ki mar ki mata da 32.08% na u 2014-15 hadooh u 2021-22, ka Committee da phah ko yei tyrwa wow pynku noh ya ka poisa wa ye u pynlut heipor wa pynman Election.
Hajrong ini, ka Commission da pdiang ko yeini i tyrwa wow pynu noh ya ka poisa wa da chah wow pynlut heipor wa pynman Election iwa da dep leh wow mynjur da ka Ministry of Law waka Legislative Department ka ri.
I rukom pynlut poisa iwa da chah neini cha khmat man i kamni ha wah:
Neibynta ki Parliamentary Constituency namo ki Election MP ha ki Constituency wa heh da chah wow pynlut T. 95 lak iwa da pynku naka T. 70 lak katwa ha ki Constituency wa khian da chah wow pynlut T. 75 lak naka T. 54 lak (i warim toh yong u snem 2014).
Ha ki Assembly Constituency namo ki Election MLA da pynku cha T. 40 lak ha ki Constituency wa heh heiwa iwa rim toh T. 28 lak katwa ha ki Constituency wa khian da pynku cha ka T. 28 lak naka T. 20 lak (i warim toh yong u snem 2014).
