Shillong: Wat hapyrdi i chitom poisa wa joor ka jylla, hadien wa kut ka Cabinet Meeting ki montri wa pynman ynnin ka sngi, da chim ya ka rai wow pynku tulop ya waroh kiwa kreh sorkar da 268% (2.68 Multiplying Factor) wei wow e ya ka Arrear wa 40% nadooh u bnai wow wan.
Ka pynku tulop thymme u kheiñ nadooh ka 1 tarik Duyatra (Jan) 2017.
U montri rangbah ka jylla da ong u wa ka sorkar hadien wa da bichaar ko ya i e yumut ka 5th Pay Commission wei hadien wa da bichaar bniah biang sa ka Empower Committee da pdiang wow pynku tulop ya waroh ki kyrdan wa kreh sorkar deiwa kheiñ nadooh 1 tarik Duiatra, 2017 wei u su leh ya ka Arrear 40 percent.
“Nachwa ka tulop (Basic Pay) yong ki wa kreh Grade IV man ko T. 6500 wei kattu u ku ko cha ka T. 17500 chi bnai,” da ong u Montri Rangbah u Dr. Mukul Sangma.
Ha ka chi bnai, i yoh tulop u Peon wa tip leh kam ki Grade IV ym duna ko ya ka T. 30,000 katwa ki Grade A ym duna ya ka 90,000 hajar ha ka chi bnai.
Nalor ka Basic Pay, ka sorkar da pynku lut ko ya i e bai yung cha ka T. 8000 ha sor,T. 6000 ha district wa 5000 ha kiwi ki thaw.
Ka sorkar da pynku ko ya ka bai skur kawa T. 11,000 , ka tulop tre cha ka T. 7000 tyngka, ka bai hang diñ tlang cha ka T. 600, nalor ka bai lai bai wan wa ka bai sumaar leh da pynku lut.
Ya ka bai check-up chisien shi snem ya waroh ki wa kreh sorkar da e 2000 chi snem. Katwa ya ka TA/DA u e katkwa booh ka sorkar pyrdi.
U Montri Rangbah da ong u wa neibynta kani ka pynku tulop, ka sorkar daw haap pynlut chooh chooh hadooh sa T. 929 Klur ha uni u snem kynthup ya ka 40% Arrear.
Ya ka 60% ka Arrear wa sah daw su ha ki arbynta, 30% ha u snem 2018-19 katwa ya kawa sah ka 30% u su ha u snem 2019-20
Discussion about this post