Jowai: Ka All Sohkha Development Committee toh kawi na ki seiñ wada chna kyrpang nadooh u snem 1994 da ki waheh wasian yong ki soo tylli ki kyntoit ka chnong Sohkha wei ka thong wa hakhmat yong kani ka seiñ toh wow pait yei miat i bha ka imlang sahlang wei wow kyntu kynrong kyrpang yei thoh i puræ hapyrdi ki khon ka chnong ka thaw.
Na ki snem cha ki snem kam wow pynchlur wei e mynsien ya ki khon khynroo khyllood ka chnong Sohkha kani ka seiñ da pynman ko i pynkup burom wa kyrpang ya ki khynnah skur wa poi chakhmat ha ki kyrdan puræ. Ha uni u snem ini p pynkup burom da man ko ka sien wa 16 wei da pynman ya ka ha ka sngi Pynsin 4 tarik u Kmaichonglad ha Sohkha Govt. Higher Secondary School, Sohkha dei wan sakhilang u Lahkmen Rymbui, Minister i/c Education, Home (Police) & Forest chirrup i synranlang u D.P. Wahlang, IAS-Principal Secretary Education, IT etc. ka sorkar Meghalaya, ka J.U. Kharpuri, MCS ADM & SDO Amalrem Civil Sub- Division wa kiwi kiwi kiwa chah khut sñiawbha.
U H.B. Lanong, Adviser ka ASDC kam u chongknor da e u ki kyntien pdiang burom katwa u P.S. Suchen, Secretary ASDC da khana u yei parom wa tbian i lai luti ka All Sohkha Development Committee wei da pynsñiaw u leh hakhmat u Lahkmen Rymbui yei duna tymbuit kiwa ka Sohkha Govt. Higher Secondary School dawa ko wow em neibynta wow man kani ka chlem sikai hapoh ka chnong kawa ye u e i chakri wa miat wabha ya ki khon ka chnong ka thaw, kam i em ya ka Laboratory, ka Auditorium, i booh nae thung ya u nae ka Regular Principal, i chna ya ka Fencing, i booh ya ki wakreh wa biang kam ki UD wa ki LD wa i booh ya ka MBOSE Examination Centre hapoh ka chnong Sohkha.
Kag S. Bareh, In-charge Principal Sohkha Govt. Higher Secondary School, Sohkha ha kani ka sngi da chim ko ya i bynta wow khana pynsñiaw ya ki moomær yong ka skur ha ka SSLC wa ka HSSLC Exam 2020 ka MBOSE, heiwa dei sñiawsarong ong ko wot hapyrdi kiwa boon ki moochynthut, dei yakrehlang hapyrdi ki khynnah skur, kiwa sikai wa ki manbei manpa, Pass Percentage yong ki khynnah man hi ko kawa rap miat heiwa ha ka SSLC Examination ki khynah wa lait daman ki 91.33%, ha ka HSSLC Arts won 100% katwa ha ka HSSLC Science wan man ko 60% wei iwa sñiawsuk chooh chooh wa ha ka SSLC Exam, u Lakhon Larry Brown Khonglah da rah naam rah burom u ya ka skur kamjooh ya ka chnong Sohkha deiwa psiah Top 10 Merit List ha ka kyrdan wa khynde.
U Lahkmen hawa e kyntien kam u kongsan, da kitbok kitrwiang u ya ki khon khynroo khyllood kiwa da yoh yeini i burom wei heijooh i por e mynsien u leh ya waroh ki khon ka chnong Sohkha deiwa ong ka juk katni toh daphær ko neiwa nachwa wei ymtoh de ka por ka juk wow yooluti bait du kat ya ki kaam sorkar. Chooh chooh leh e u i sñiawngooh wa khroo ya kiwa sikai wa ki manbei manpa kiwa khlem dei kyrchaan yong ki kini kiyi kiyi ym ye ki u man.
Kiwi kiwa da e yei klam e mynsien ya ki khynnah ha kani ka sngi toh u D.P. Wahlang, ka J.U. Kharpuri wa u V.L. Gadew, Chairman ASDC.
Yeini i pynkup burom ya kini ki khon khynroo khyllood da pyndep da u Lahkmen Rymbui kam u kongsan, u D.P. Wahlang kam u Symbood Kongsan, ka J.U. Kharpuri, ka D. Syiem, DSEO West Jaiñtia Hills wa ka S. Bareh, wei deiwa kheiñ kyllum lang waroh kiwa da chah pynkup burom ha kani ka sngi da em ki 32 ngut wa kynthup ya 22 ngut ki khon khyllood wa 10 ngut ki khon khynroo
Wei iwa rap kyrpang i pynkupburom ha kani ka sngi toh ya u Lakhon Larry Brown Khonglah uwa da rah naam rah burom ya ka skur kamjooh ya ka chnong Sohkha ha ka SSLC Exam 2020 deiwa psiah ha ka Top 10 Merit List 9th Position.
