Jowai : Ynne ka sngi ka Dorbar Chnong yong ka Wapungskur da pynkup burom ko ya u Puramon Kynjing uwa man kam u Dolloi ka Elaka Jowai ha ka yalang wa tbian.
Ya ka yalang da pyllai da u Asst. Waheh Chnong u H. Diolang Dkhar heiwa da yoh yei klam na u Waheh Chnong warim ka Chnong u Norly Ryngkhlem wa na u Waheh Chnong u Satly Ryngkhlem.
Kiwa da klam da e khublei ki ya u Dolloi, wei da kyntu ki leh wow man u u bru uwa bichaar hok ya ki khon ka Elaka waroh kawi wei kani da man ko leh ka sien wa nyngkong wa ka Wapungskur da pynkup burom ko ya u Dolloi.
U Dolloi hei klam ha kani ka sngi da ong u wa yieñ u yow man Dolloi toh yow pynneh pynsah ya ka dustur riti wei kam u Pa Dolloi ym bichaar arsap u ya kiwa thap cha oo wa ya ki wym em thap cha oo wei yow mylliñ noh ya ka yaleh. Emkaam i maya neibhah wa man ko ka spah yong u Blai.
Da kular wa ym hoi u artatein ki paidbah yei bichaar hok yong oo wei lada chem ki yei duna i krehkaam u kam u Dolloi toh u wan ki cha khmat yow pynbait yei duna yong oo. Da ong u leh wa daw pynman u ya ka Dorbar wa nyngkong ha Wapung yow pynbait ya u pood u ang.
Da kyrpaad u leh ya kiwa chong cha khappood wow man ki kiwa em iwi donhi i sur ym hoi u chaad ki chibet cha khmat chibet cha dien.
Ha kani ka sngi da yoh leh ya ki rwai wa ki chaad tynre na ki khon ka chnong.
Discussion about this post