Ki bor District ka East Jaiñtia Hills District ynne da pynman ki ya pynkup burom ya kiwa yalehke ka District kiwa da yoh takma ha ka Meghalaya Games 2022 wa dang dep pynman kamjooh ha ka State Level Inter-School Athletics Meet 2022.
Kini ki 62 ngut kiwa yalehke wa da wanrah burom ya ka District da yoh ki leh da ka song poisa. 44 ngut toh kiwa jop ha ka Meghalaya Games wa 18 ngut kiwa jop ha ka State Level Inter-School. Kiwa yoh takma Ksiar ha ka Meghalaya Games da e ya ki da ka song poisa wa T. 5500, kiwa yoh takma Rupa da yoh ki T. 3300 katwa kiwa yoh takma Tama da yoh ki T. 1700.
Kiwa yoh takma Ksiar ha ka State Level Inter-School da e ya ki ya ka song poisa kawa T. 5000, kiwa yoh takma Rupa da e ya ki T. 3000 katwa kiwa yoh takma Tama da e ya ki T. 2000.
Kam chibynta wow pynchlur chooh chooh ya kiwa yalehke, da sdang leh ya ka Sponsor-An-Athlete Program kawa da sdang da ka yung krehkaam u DC yow pynchlur ya kiwon kiwon wow kyrchaan poisa namo wow Sponsor yow pynkhreh uwi lane kawi na kiwa yalehke.
Ha kani ka sngi da pynbna ya 15 tylli ki Sponsorship wa da e da ka North East Transmission Company (NETC), u MLA ka thaaiñ u Kyrmen Shylla, u Deputy Commissioner ka District, u Abhilash Baranwal, na u Superintendent of Police ka District, u Jagpal Singh Dhanoa wa kiwi kiwi de.
Lyngba kani ka Sponsor-An-Athlete Program, daw yarap ya kiwa yalehke wa em yei sap kamjooh ya ka mynried yong ki.
Neiliang u Kyrmen Shylla uwa man leh kam u Montri sorkar da pynbna u T. 5 lak cha ka District Sports Office kawa daw pynemkaam yow thied tiar yalehke neibynta kiwa yalehke ka District.
