Amlarem: Kam chibynta wow pynchlur ya ki khynnah ha ka liang ka puræ phuthi, sa chisien ka Elaka Satpator Dolloiship ha kani ka 14 tarik da saam ya ki khusnam cha kitu ki khynnah kiwa wan chakhmat ha ka Exam yong ki wei kani ka saam yong katai ka Elaka da man ko ka sien kawa 11 nadooh wa da sdang ya katai ka saam khusnam.
Ya kani ka 11th Education Award 2019 da pynman ha ka Hall ka Elaka kawa em ha ka chnong Pdengshakap heiwa da pynlai ya katai ka saam khusnam da u Kolmen Pohshna, u dkhot yong ka Elaka ha i emlang u MLA ka thaaiñ u Lakmen Rymbui uwa man leh u montri ka chnat puræ puthi ka jylla, kam u kongsan, u Gillroy Tariang, MDC ka thaaiñ kam u symbood kongsan, u Daman Langshiang, Dolloi ka Elaka, u L.B. Sumer uwa e buit ka Elaka, ki dkhot ka Elaka, ki waheh chnong, ki bei ki pa yong ki khynnah wa ki kattu katni ki paaid yong ka thaaiñ kiwa da wan sakhi lang.
Ya kani ka pynkup burom da yoh wow pynkup ya 16 ngut ki khynnah kiwa da lehbha kiwa na katai ka Elaka wa na ki chnong waphær waphær kiwa haap hapoh ka Elaka nadooh ki SSLC, HSSLC, CBSE wa ha ki Degree waphær waphær yong ka puræ puthi .
U Lakmen Rymbui ha i klam yong oo kam u kongsan da pynsñiaw u yei kmen heiwa da yoh u wow embynta lang ha kani ka saam khusnam yong ka Elaka Satpator, heiwa da e u yaka yaroh leh ya katai ka Elaka wa da ye ko wow pynman na iwi i por cha kawi kawa man kam chibynta wow pynchlur ya ki khynnah ka thaaiñ heiyatoh wa i nang i stat, wei kyntu u ya kitu ki khynnah kiwa da wanrah naam rah rah burom ya ka Elaka wow nang krehchitom chooh chooh yow yoh khait ya u soh wa thiang ha i im yong ki, deiwa pynrap leh wa neiliang ka sorkar ka thong wa hakhmat dooh toh wa kammon wow pynku yaka nang i stat hapoh ka jylla hi waroh kawi.
Ha kane ka sngi da yoh leh yei klam na u Gillroy Tariang , u Lamdibok Sumer, u Daman Lakashiang, na u waheh chnong Pdengshakap wa na u Rester Tariang napyrdi kiwa sikai.
Discussion about this post