Ynne ka sngi ka Jaiñtia Institute of Technology (JIT) Jowai da pynkup burom ko ya 3 ngut ki khynroo khyllood wada leh bha hei chah sikai Data Entry Operator wa e mynkna kawa haap hapoh ka Skills Meghalaya kawa da kyrchaan poisa daka Meghalaya State Skill Development Society, Shillong.
Ya kani ka pynkup burom da pynman ha Indoor Hall ka Lion Mission Compound, Jowai wei ki khynroo khyllood wada pyndep yei chah sikai wa 3 bnai da em ki 47 ngut katwa ki 3 ngut wada yoh khusnaam hajrong i lehbha yong ki kynthup ki ya u Eveningstar Dkhar uwa da yoh nyngkong wei da yoh u leh da ka Full Set Computer, wa ar ka Leikiru Ymbon kawa da yoh ya u 64 GB u Storage Device, wa le won ka Ibaiahunlang Khongstia kawa yoh da u 32 GB Storage Device.
U Lambormi Suchen, Skill Development Officer ka West Jaiñtia Hills District hawa klam da pynkynmoo biang u wa kani ka Skills Meghalaya toh ka thong wada mang ka sorkar wow sdang ya ki e sikai waphær waphær neibhah wa chynna ko yei saja ki khynroo khyllood u yoh khih yoh kreh. Kamtæ lyngba i sikai wa yoh ki ye ki wow kreh ha kiwon kiwon ki Company næ chnat sorkar wei kamjooh leh u yieñ hei yong ki hi i kjat.
U W.K. Kharbukhi, EAC West Jaiñtia Hills District hawa e yei klam ong u wa kani ka sngi pynkup burom man ko leh ka sngi wa yoh phi yei myntoi neibhah wada ye phi u pynku yei sap, kamtæ yooluti u wa i ye yong ki u pyndep yei chah sikai u yarap haroh ko yaki wow yoh khih.
Heijooh i por ong u wym du wa yarap ko ya ki u yoh khih tangwa yow ye u lehbha haroh ha kawon kawon ka kaam wa kreh ki, deiwa kyntu leh ya ki u pait jngai haroh wym wow pyrkhat du ya ka Data Entry.
Neiliang u Managing Director ka JIT u Bankitbor Marweiñ, khana u wa napyrdi ki khynroo khyllood wa pyndep yei chah sikai em kiwa da yoh kreh ha ki Company em won kiwa da yieñ hei yong ki hi ki kjat. Katwa ya kiwi ki wym pu yoh won ong u neiliang ka Institute leh daw pyrchang thooh laad ko ya ki.
Da yoh leh yei klam na ki ar ngut kiwa da khana yei yoh myntoi ki na ini i chah sikai.
