Ka Jantia National Council (JNC) ha ka 9 tarik da pynkup burom ko ya ki khynnah skur kiwa da lehbha ha ka Secondary School Leaving Certificate Exam 2022 ha ka yalang wa da pynman ha Khliehriat West Community Hall heipor 1:00 waje i sngi.
I rukom e khusnaam toh deiwa jied 4 ngut ki khynnah na kawi kawi ka Secondary School kiwa em hapoh ka Head Quarter ka East Jaiñtia Hills District heiwa waroh ki khynnah skur da em ki 21 ngut.
Hachwa wow saam khusnaam ya ki khynnah skur, da pynman chwa da ka yalang wa pynlai da u Leoshwa Siangshai uwa man leh uwa sikai skur warim yong ka Little Flower Secondary, Khliehriat heiwa da yoh ya ki kyntien pdiang burom ya waroh na u Symboh Sumer, G.S, JNC Khliehriat Circle.
Neiliang kawa sikai ka da yoh i klam na ka Lida Mary Sutnga, Khliehriat Higher Secondary School wa na u Wanshwa Suting, President rangbah ka Jaintia National Council, uwa da e yaroh ya ki khynnah skur wa da minot ki wow poi chakhmat ha kani ka SSLC Exam 2022, da ong u leh wa i chlur ka seiñ wow pynkup burom namo wow e Award ya ki khnnah skur mih ko nei chynna ka seiñ yei kreh chitom ki khynnah skur wow poi chakhmat, wei da kyntu u leh ya ki wow nang pteiñ u kreh chitom khnang wow nang yoh chooh chooh ki ya ki Award waphær hei lai luti yong ki chakhmat.
U kongsan ha kani ka sngi, u Justine Dkhar, MLA warim ka Khliehriat Constituency uwa man leh u Principal Ka Ambrose Memorial Secondary School, da pynkynmoo u ya ki khynnah skur wa la stat katwa stat ki leh ham mylliñ ya u A wa ya u B iwa mut A toh ka Akor B toh ka Burom wei kini ki ar tylli emkaam u neh hei im yong ki.
Neiliang u Dr. P. Nongtdu, Principal Jaiñtia Eastern College, da ong u ki khynnah skur emkaam u tip ki u jied ya ka luti yong ki khnang wow lait ki nei sihlet hadien habood yow ye ki u poi cha ka thong kawa ki da mang ki.
Ya ki Award cha ki khynnah ki 5 tylli ki Secondary School kiwa em hapoh Khliehriat kynthup ki ya ka Khliehriat Higher Secondary School, Little Flower Secondary School, Khliehriat Presbyterian Secondary School, Ambrose Memorial Secondary School waka Little Star Secondary School.
Ki khynnah skur kiwa yoh Award toh Phisadalin Lyngdoh, Ibalari Tlang, Rishot Mukhim, Risakhiat Sukhlain, Ri-O Langstang, Wandaphi Pala, Damepaia Bamon, Bisharlang Salahe, Mentre Dkhar, Venessa Rymbai, Katrina Swer, Mary Vianney Bareh, Valencia Dkhar, Dashisha Langstang, Eriton Gashnga, Ferdinand Lamare, Edison Nampui, Destiny Shadap.
Da pynkut ya ka yalang da ki ktien e khublei na u Rimiki Dkhar, President JNC-Khliehriat Circle wei da pynphooh pynphieñ ya ka yalang dei chaad tynre wa yahkhmat da ka Hidakel Paslein.
