Ka Jowai Consumer Co-operative Store, kawi na ki Co-operative Society kawa da sdang nadooh u snem 1963, kawa em i dukan hajan ka Khyriem Meghalaya Studio, Īawmusiang Jowai, ynne ka 31 tarik Duyatra 2022 da wan pynkup burom ko ya u S. Quotient Sumer ha yungsah ka kurim wa ki khon yong oo, ha Laloo Vaza Jroŋmōsiaŋ Panaliar.
Ya ka yalang tbian da pynlai da u Chairman ka Jowai Consumers Co-operative Store, u O.C. Lakiang, heiwa yei klam dayoh na u Hunmon Sutnga wa man u Secretary yong ka. U Hunmon Sutnga da ong u, wa hadien wa dalai luti i krehkaam yong oo kam u Secretary heijooh i por u O.C. Lakiang kam u Chairman; da kynræh ki ya ki kot ki sla warim nadooh wa sdang ka Society, heiwa dachem ki wa u S. Quotient Sumer man u, uwi na kiwa seiñ ya ka. Kamtæ da pyrkhat ka Board of Director watoh u leh iyi ræ iyi ya oo katwa dang yoh u yoo da oo hi, hanla man iwa khian leh. Dabooh ya ka sngi ynne, wa hei rata iwa da heh, kamjooh leh hei em uni u khñiang khlam, iwa bha dooh u lai da i hi cha yung yong oo. Da e u yei kyrkhu kyrdoh ya uni uwa seiñ yoh u nangkhlan chooh chooh i doh i pran yong oo katdang mih ki sngi, dep neitæ da pynkup burom ya oo da ka Ryndia Tlem.
Da e ya ka Momento sah kynmoo wa da thoh ya ki kyntien da ka Elbister Sumer wei hadien neitæ, u Chairman da khana u yei lai luti ka Co-operative Store hadooh kamwa man katni wa da em ko yei yong ka dahi i thaw hajan Circuit House Jowai.
Dayoh yei klam na u S. Quotient Sumer, heiwa da pynsñiaw u yei mynsien kmen wa ki dkhot wa katni tip ki u pait ya ki kaam kiwa booh wa seiñ. Da khana u wa kammon sdang ya ka, weiwa neiyi i daw wa poi hadooh wow sdang ya kani ka Co-operative Store leh. Da ong u wa ha kitæ ki por, chiboon i yoh yarap, u wadooh u waduk, nadooh ki yudiang næ yuslieñ khonboo hadooh ki Copy ya ki khynnah skur næ kiwi tawon nei em kani ka dukan, neibhah ka idor wow dai ko toh iwa duna na kiwi tawon ki dukan. Da kyntu haroh u ya ki dkhot wa katni toh u man ki kiwa pyrkhat jngai wei wow em i kyllooid mynsien u kreh yoh u ye u pynku chooh chooh ya ka.
Da khut leh u Chairman wow klam na ka yung, heiwa dayoh yei klam na u Riquoma Rq. Laloo, waman u khon waheh yong u Quotient Sumer. U Riquoma da ong u, wa i tipmit ya kiwa seiñ wa sdang, man ko i kyrkhu ya kiwa rap pateiñ, tæ yooluti wa kiwa katni ki dkhot kani ka Society yong ka Jowai Consumers Co-operative Store, u nang ye chooh chooh ki u pynheh yeiwa ki wanchwa da sdang ki. E khublei u ya waroh ka Board of Director yong ka Co-operative Store wada pynman ki ya kani ka yalang, man ko ka wow sahkhana pateiñ ya ka yung wa ya ka chnong ka thaw hi waroh kawi.
Ya ki kyntien e khublei da yoh na ka Riverlincy Lyngdoh heijooh i por malu mala da pynchyiap yei khana wa lai luti ka Jowai Consumers Co-operative Store na uwi u Secretary cha u wi, kammon i eh wa kammon ki jop wa dayoh ki.
Kamwa pynkynmoo haroh wa u S. Quotient Sumer daŋdep pynkup burom haroh ya oo ha Mumbai uni u bnai wadep, u Kmaichonglad 2021. Heiwa ka My Home India da pynkup ko ya oo ya ka Award watip kam ka “One India Award”, neibynta ki kaam yong oo ha ka imlang sahlang, kam uwa thoh kyrpang ya ka kot “U Kiang Nangbah”.
