Ka JSU Syndai Unit deilang wa ki dkhot ka JSU Shillong Circle hapoh i yahkhmat u President, u Pynshailang Suliang wa u General Secretary ka Syndai Unit u Heiplanmiki Tariang wa uwa yahkhmat ka JSU Shillong Circle u Banker Lamurong wa kiwi ki dkhot da lai ki wow pynkup burom ya ka Evangel Pohplet ha yung yong ka ha Shillong ynnin ka sngi.
Ka Evangel Pohphlet toh kawa da mihkhmat ya ka jylla Meghalaya ha ka 3rd National K-1 Championship Amateur/Pro & K-1 Pro Boxing kawa da pynman ha ka jylla Rajasthan wei kani ka lympung da man ko kawa heh dooh yong ka ri India heiwa ka Evangel da yoh ko yei naam jop.
Ka Evangel toh kawa da em 19 snem i rta ka khon ka Olivia Pohplet wa u Khyrñiom L Khonsti wei dang lai puræ Class XII ko ha Laban Presbyterian Higher Secondary School. Da sdang ko wow chah sikai ha ka Kickboxing nadooh u snem 2017 ha Lumparing Sports Club.
Neiliang u President ka Syndai Unit da ban joor u yaka sorkar jylla wa toh u tipmit ko ya kini kiwa yalehke kiwa da mihkhmat ya ka jylla ha ki lympung wa heh wei ka sorkar toh u e yarap ko ya ki yow ye ki u nang pynpliah chooh chooh ha ki kaam yalehke ka yong ki wei da ong u leh wa ka sorkar jylla hadooh katni da chna kyndeh hi-eh ko ya ka State Youth Policy kawa ye u krehkaam yow wanrah yei myntoi ya ki khon khynroo kiwa em yei sap ha ka jylla tangwa da phylla won wa ka sorkar jylla hadooh katni da leh mutlop ko wei ym pynkrehkaam ko ya kani ka Policy kawa da dep leh wow mynjur.
Kamtæ ka seiñ da dawa syndon ko na u Montri Rangbah ka jylla, u Conrad Sangma wa toh u chimkhia u pynkrehkaam wut wut ya ka State Youth Policy 2021 khnang wa ki khon khynroo khyllood kiwa wanrah burom yaka jylla u yoh noh ki daka Scholarship kamwa da mang kyrpang neibynta yong ki.
Ka seiñ da ong ko leh wa lada ka sorkar em ko i thmu wow e T. 10 lak cha ki Harijan ileh ym hoi u e yarap chwa cha ki tre ri.
