Ka JSU Central Body ha ka 25 tarik uni u bnai da pynkup burom ko ya u General Secretary warim yong ka, u Treiborlang R Suchen uwa da chongngiah na ka seiñ wow yakhun ya ka Election MDC ka wow wan.
U Treborlang man u uwi na kiwa yahkhmat wa da chakri chiboon ya ka imlang sahlang, hapoh yong oo da kreh u ha kiwa boon ki bynta wow kyntu kynrong ya ki mat wa ktah ya ka jaitbru.
Ya ka yalang pynkup burom da pynlai da u Ryngkhat Diengdoh u Disciplinary Secretary ka seiñ.
Da yoh i klam na u President ka seiñ, u Jersom Shylla kamjooh na u Acting Secretary, u Neilkee Mukhim, na u Publicity Secretary u Dapmain Suchiang wa na u Finance Secretary u Treki Mukhim.
U Jersom da pynkynmoo u wa ka JSU da pynmih ko chiboon kiwa mihkhmat nadooh nachwa deiwa e mynsien ya kiwi ki dkhot wow pteiñ u kreh chitom.
Neiliang Treiborlang da sneiñ u ya ki dkhot ka seiñ wow man kiwa kreh katkam i bor yong ki neibynta i bha i miat wa ka mynried ka jaitbru.
Ka seiñ da kitbok kitrwiang ko leh ya oo khnang wow yoh u yei jop wa emburom ha kani ka Election.
Discussion about this post