Ka KSU-EJHDU lyngba ka chnat krehkaam yong ka KSU Jalaphet Unit ha ka 14 tarik uni u bnai da pynman ki ya ka pynkup burom ya ki arngut kiwa yakura kiwa da jop haka National MMA Championship kawa dang dep pynman haka jylla Manipur kitæ u Fivestar Bareh uwa da yoh ya ka takma Rupa wa u Kisan Bareh uwa da yoh ya ka Championship Belt.
Ha kani ka sngi da yoh i klam na u Streamly N Suchen, President KSU EJHDU, u Cherity Suja Asst. Finance KSU EJHDU wa na u Chairman ka chnong Jalaphet Bri Sumer.
Neiliang u Shwari Ryngkhlem, Sports Secretary KSU EJHDU da kylli u ya ka sorkar wei kamjooh ya u Sports Minister wa ileh wym em pait ki khmat cha ka thaaiñ East Jaiñtia Hills yow kyntu ya ki kaam yalehke ha ka East Jaiñtia Hills District neibhah kani ka District ym em ko ya ki madan yalehke wa paka nadooh ka madan yalehbol, madan Basketball wa kiwi kiwi.
Da ong u wa ka sorkar da toh u e bhah ko ya ka East Jaiñtia Hills District kawi ka Artificial Turf, Synthetic Track wa kiwi de kamwa em cha kiwi ki District yow yoh ki khynroo khyllood, ki khynnah ka District wow pynjanai ha ki yalehle waphær waphær yow nang ku chaphrang wei yow ye ki u rah burom ya ka District ka jylla wa ka ri hi waroh kawi.
