Ka Khasi Students’ Union Sports Committee East Jaiñtia Hills District Unit da pynkup burom ko ya u khynroo Eleven Dkhar uwa na ka chnong Tuber, East Jaiñtia Hills District uwa da wanrah burom ya ka jylla kamjooh ka District ha kani ka 2nd North East Olympic Games 2022 kawa dang dep pynkut.
Ha kani ka pynkup burom da ya emlang kiwa kitkaam chnong ka Tuber Kmai Chnong nadooh Waheh Chnong, Secretary Chnong wa kiwi kiwi kiwa kitkaam chnong wa kiwa ha-yung ha-sem yong u Eleven Dkhar wei neiliang ka seiñ da mihkhmat da u Chairman ka Sports Committee, u Shwari Ryngkhlem deiwa ya emlang u Deiniwan Lyngdoh, Organizing Secretary wa u Phulmi Dkhar, Asst. Secretary KSU Wapung Unit.
U Eleven toh uwa da yoh le tylli ki takma wa kynthup ya ka takma ksiar ha ka yaphet 800m, takma rupa ha ka 1500m wa ar tylli ki takma tama ha ka Relay Race (4×100 waka 4×400).
Ka seiñ da pyn-ehdaw, pyn-ehnasib ko ya u Eleven wa kamjooh leh ya waroh ki khynroo ki khyllood ka District kiwa da chimbynta ha ka 2nd North East Olympic Games 2022 wow nang kreh chitom ki yow nang ku ki chakhmat ha ki kaam yaleh Sports.
