Jowai: Ka Khasi Students’ Union (KSU) Malki Circle kam chibynta wow e mynsien wei wow tipmit ya ki khynroo khyllood wa puræ ka chnong Malki kiwa da poi chakhmat ha ka puræ puthi yong ki, da pynman yaka Mait Shaphrang Award 2019 ha ka 27 tarik uni u bnai. Ya kani ka lympung pynkup burom ya ki khynroo khyllood da pynman haka Indoor Community Hall yong ka Khliehshnong, Malki ha i por 2 waje i sngi.
Ka KSU Malki Circle ha kani ka sngi da pynkup burom kyrpang ko leh ya kitu kiwa yoh Distinction ha ka Subject Khasi ha ka Esam SSLC kawa dang dep.
Ka KSU Malki Circle ka la pynkup burom ko hadooh 31 ngut ki khynroo khyllood ka chnong Malki ha i emlang ka Dr. M. Ampareen Lyngdoh (MLA, East Shillong Constituency), u Miguel Badwar (Secretary, Dorbar Shnong Malki) u Shemphang L. Mawphlang (Vice President, KSU Central Executive Council) wa u Donald V. Thabah (General Secretary, KSU CEC) kam kiwa chah khut sñiawbha. Kiwi kiwa da emlang ha kani ka sngi kynthup ya u Biangbor L. Paliar (Organising Secretary, KSU CEC), u Pynkmenlang Sanmiet (Executive Member, KSU CEC), u Iashanborlang Mukhim (Executive Member, KSU CEC), ki manbei manpa wa kiwa chong chnong ka Malki.
U Donald V. Thabah hawa e yei klam yong oo, da ong u wa nadooh wa da seiñ ya ka KSU ki phang wa ka seiñ da jooh chim ki toh wow dawa ya ki Scholarship, wow dawa yow seiñ ya ki skur wa ki College ha ka jylla, wow wai ya ki chnat puræ waphær waphær kam ka Law Department ha skurbah NEHU ha u snem 1992 wa kiwi kiwi. Da pynkynmoo u leh wa i dawa wow pynpsiah ya ka ktien Khasi ha ka 8th Scheduled kawa ym toh kawa dang heini wei da sdang nadooh ki snem hawa kut yong ki 1970.
Ka Ampareen hawa e yei klam da e mynsien ko yaki khynroo khyllood ka chnong Malki wei da yaroh ko leh ya ka KSU Malki Circle kawa da chim ya kani ka laad wow tipmit ya kitu kiwa da leh bha ya ka Subject Khasi. Da ong ko leh wa i ktien Khasi man ko kam ka thied snaam yong ka jaitbru kamwa man kyrpang ka ktien tynre ha man ka jaitbru ha sla pyrthai. Da kynmoo ko leh yei por wa dang puræ ko ha Delhi University wa kammon kiwa puræ ha katai ka skurbah da pynemkaam bait ki da ka ktien Hindi kam ka ktien pyrdi ha waroh ki kaam. Da ong ko wa i tai i maad i yong ka da pynkhyrngiat ko ya ka nadooh katai ka por wei da chim ko yaka rai wa manda liwan biang ko cha yung daw yaleh ko katwa ye yow pynemkaam bait da ka ktien Khasi ha ki kaam ki jam. Da klam ko leh yei ma kawa yang yaka jaitbru lada ki khon khynroo khyllood pynbood yongton ki ya kiwi wei mylliñ ki ya i yong i hi.
Ka KSU Malki Circle ha kani ka sngi da e sñiawbha ko cha waroh ki 31 ngut da ki Mementoes deilang wa ka song poisa wa T. 1000 ya kitu kiwa da leh bha haka SSLC, HSSLC, CBSE, Bachelors’ Degree, Masters’ Degree wa T. 5000 ya kitu kiwa yoh Distinction ha ka Subject Khasi.
Discussion about this post