Ka KSU San Chnong Unit haka 15 tarik uni u bnai da yoh ko wow pynkup burom da ka 2nd Miatshaphrang Academic Award 2022 ya ki 27 ngut ki khon khynroo khyllood yong ki san tylli ki chnong wa kynthup ya ka Lumshyrmit, Cham Cham, Mutong, Mukhaialong wa Pynthorsale kiwa da lehbha ha ki Exam waphær waphær wa kynthup ya ka SSLC, HSSLC wa Bachelor Degree.
Ya ka yalang da pynlai da u President yong ka KSU San Chnong Unit, u Delmon Phawa uwa da ong wa ka KSU ym em ko ya ka spah ka phaw wow e tangwa em ko ya ka spah mynsien yow pynchlur ha ka puræ puthi.
Da yoh leh ya ki kyntien pdiang burom na u Pynkhreh Phawa uwa man u General Secretary yong ka KSU San Chnong Unit uwa da ong wa ka KSU toh kawi na ki seiñbhalang kawa leh nyngkong ya kani ka pynkup burom hapoh kani ka thaaiñ.
Da yoh leh yei klam na u Marchy Dkhar uwa man u Waheh Chnong ka chnong Mutong uwa man leh u Finance Secretary yong ka KSU San Chnong Unit uwa da e yei kyntu kynpham ya ki khon khynroo wow minot ki khnang wow yoh ki u khait ya u soh i jop.
