Ka Khasi Students’ Union-Shangpung Unit da pynkup burom ko ya kiwa da lehbha hei puræ puthi da ka 3rd Mait Shaphrang Academic Award ha ka 13 tarik uni u bnai ha Shangpung Pohchnong Sien Tylli Lang Auditorium Hall heiwa da wan sakhi da ki khynnah skur na ki skur waphær waphær ka chnong.
U Pynshaiborlang Rani uwa man u Information and Publicity Secretary yong ka KSU Central Executive Council da man u kam u kongsan heiwa da pynskem leh ya kiwa kitkaam wa thymme ka Shangpung Unit.
Ha i bynta wa nyngkong da sdang chwa da ka Quiz Competition heiwa da jop ka Lummuroo Secondary School wei da wan wa ar da ka Kiri Daloi Secondary School wei heiwa le ka RMSA.
Ha ka yalang saam Award da e khusnaam leh ya ki khynnah wa wan chakhmat ha ki kaam yalehke Sports kam ka Taekwondo, Rock Climbing, Kick Boxing wa kiwi kiwi.
Da em 16 ngut kiwa yoh khusnaam ha ka Sports wei ka seiñ da pynkup burom ko ya ki 44 ngut ki khynnah wa wan chakhmat ha i puræ puthi ha ki Exam yong ki kyrdan waphær waphær.
U Laitphar Syngkrem da kyntu u ya ki khynnah wow man kiwa minot ha i puræ puthi khnang wa chisien ka sngi u ye ki u chakri ya ki paidbah.
U Pynshaiborlang Rani da sneiñ kyntu u ya ki khynnah wow man kiwa minot wei wow ri ya ka burom ka akor la ha iwon iwon i thaw.
Discussion about this post