Ka KSU Thangraiñ Unit kawa hap hapoh i pait i yoo ka KSU Nartiang Circle, ynne ka sngi kawa man leh i dap 1 snem i lai luti ka seiñ, da pynman ko leh yei pynkup burom ya ki khon yong ka chnong kiwa poi chakhmat, kiwa da leh bha ha ka Exam HSSLC, SSLC waka NIOS 2021 kiwa em 6 ngut.
Ya ini da leh kam chibynta wow e mynsien ya ki khon ka chnong yow kreh chitom ki ha ka puræ puthi yong ki.
Ha kani ka sngi da emlang u Reuben Najiar uwa man kam u Assistant Education Secretary ka seiñbei kam u kongsan, u Laitphar Syngkrem, Vice President Jaiñtia Hills District Unit hei synran lang u Leningrad Tariang, Organising Secretary ka Jaiñtia Hills District Unit wa kiwi kiwi ki dkhot na ki Unit ki Circle waphær waphær. Da emlang leh u waheh chnong, Secretary chnong, kiwa sikai skur wa kiwi kiwi.
Ya ka yalang da pynlai da u Chanbor War, General Secretary ka Nartiang Circle.
Ha kani ka jooh ka sngi neiliang yong ka seiñ da e ko leh yei kti yarap da ki marbaam cha ki khonswet wa em hapoh chnong wei da pynman leh yei ah Cake kam i dak kynmoo burom yei dap chi snem ka seiñ.
