Ka KSU Wapung Unit haka 16 tarik uni u bnai da pynkup burom ko ya 27 ngut ki khon khynroo khyllood ki san tylli ki chnong wa kynthup ya ka Wapungskur, Wapung Chnong, Tuber Kmaichnong, Tuber Chohchrieh, Mookhep kiwa da lehbha ya ki Exam waphær waphær kam ka SSLC,HSSLC, Bachelor Degree wa Master Degree wa kiwa da pyndep yei puræ Doctor, kawa tip kam ka 3rd U Woh Tep Kyndait Academic Award.
Da ya emlang leh ki dkhot ka seiñ kam u Assistant Organising Secretary yong ka KSU East Jaiñtia Hills District Unit, u Shibaitlang Rymbai, u Raymond Kharjana uwa man kam u Education Secretary ka CEC, uwa da wan kam u kongsan, u Damewanhi L Rymbai uwa man kam u symbood kongsan, u Ohibait Dkhar uwa man kam uwa yahkhmat warim ka seiñ, u Kwilness Suchiang uwa man u General Secretary ka KSU EJHDU wa kiwi wa kynthup ya kiwa yahkhmat ka chnong Wapung Chnong wa Wapung Skur.
Neiliang u Ohibait Dkhar da khana u yei parom wa tbian u Woh Tep Kyndait uwa yieñ yaleh pyrchah ya u syiem ka Jaiñtiapur, u Amratap Sing uwa da thmu wow pynkylla niam Hindu ya waroh ki khon ka Ri-loom Jaiñtia wa ki khon khara ki Khad-ar Dolloi. Da khana haroh u wa em ka thma Nongsyntoiñ ha kawa u Syiem ka Jaiñtiapur da phah u da u Syiem Khynnah u Syiem Rapo Ram Sing wei u Woh Tep da jop u ya kani ka thma.
