Ka Khasi Students’ Union (KSU) West Jaiñtia Hills District Unit ha ka 30 tarik u Naisan deilang waka KSU Girls’ Wing War Jaiñtia Circle da pynkup burom ki ya ka Larisa Lamin kawa lai puræ ha Adventist Higher Secondary School kawa da yoh ya ka kyrdan wa ha khliehdooh haka Exam HSSLC (Arts) 2023 kawa da pynman da ka MBOSE.
Ha chwa wow pynkup burom da em ka yalang wa tbian wa pynman ha kani ka thaw puræ wa pynlai da ka Principal yong ka North East Adventist University heiwa u President ka seiñ, u Leningrad Tariang da ong u wa ka seiñ dap ko dei kmen hawa yoh u tip wa kawa yoh nyngkong ha uni u snem toh da ka jaitbru ka bri u Ynñiawtrep wei man ko ka sarong neibhah da boon tylli ki snem ym em kiwa na jaitbru yong i wa yoh ya kani ka kyrdan iwa pynyoo wa kat dang lai ki sngi nang ku ki bru yong i ha ka puræ puthi.
Da kyntu u leh ya waroh ki khon khynroo khyllood ka District wow lehbha ki hei puræ puthi yong ki ha ki kyrdan wapær waphær wei ka seiñ da yooluti ko leh wow nang mih chiboon kiwi kiwa daw poi chakhmat ha i puræ puthi yong ki, neibhah i yoh nyngkong ka Larisa da wanrah burom ym du ya ka bei u pa ko lane ka skur tangwa toh i burom ya waroh kawi ka District wa ya ka ri waka jaitbru Ynñiawtrep waroh kawi.
