Ynne ka sngi, ka KSU West Jaiñtia Hills District Unit ha i yahkhmat u Vice President, u Chanbor War, u Sports Secretary, u Michel Platini Mukhim wa u Finance Secretary, u Phrangki Papang da pdiang sñiawbha wei pynkup burom ki ya ka Ineshabahun Dkhar kawa da yoh ya ka takma tama ha ka lympung yalehke Hades K-Pro 3.0 Kick Boxing Pro wa da pynman ha Goa ha ka 1 tarik hadooh ka 2 tarik uni u bnai da ka World Mixed Martial Arts Union ha Goa.
Ha ka yalang wa khian da synran lang ya ka Ineshabahun da ka bei yong ka wa kiwa hayung hasem kiwa sah ha Lumpyrtuh, Mihmyntdu.
Neiliang ka seiñ da dap ko dei sñiaw sarong wei sñiawkmen wa ki khynroo khyllood ka jylla da sdang ku ki ha ki kaam Sports wa boon jait wei ka seiñ da kyntu ko ya kiwi kiwa em yei sap ha ki jait Sports waphær wow pynemkaam hok yei sap i tap yong ki.
Ka seiñ da kyrpaad ko leh ya ka sorkar wow kyruiñ khmat cha ki kaam Sports wei wow kyrchaan ya ki khynroo yeiwa emkaam ki.
Ka seiñ da kitbok kitrwiang ko ya ka Ineshabahun Dkhar wow nang ye chooh chooh wow ku ha ki kaam Sports yong i wei leh wow man ko kam ka nongmuna ya kiwi ki khynroo hapoh ka thaaiñ wa hapoh ka Bri U Ynñiawtrep hi waroh kawi.
