Ka Kur Pyrtuh Sohmynting ha ka 17 tarik uni u bnai da yoh ko wow pynkup burom ya u Dr. Ebormi Langshiang ha ka yalang wa pynman ha Community Hall yong ka kur ha chnong Sohmynting.
Kani ka sngi da man ko ka sngi wow sah kynmoo ya ka chnong Sohmynting neibhah u Dr. Ebormi Langshiang da man u soh nyngkong ka chnong wow yoh kyrdan Degree of Doctor of Philosophy (PhD).
Hachwa wow pynkup burom ya uni u khynroo, da em ka yalang kawa tbian kawa pynlai da u wasan ka kur Pyrtuh, u Lephing Pyrtuh deiwa emlang chirup wa ki Executive Member ka kur, ki seiñ manbei yong ka kur wa ki khon khynroo khyllood yong ka kur.
Neiliang u Ling Pyrtuh hawa klam ha kani ka pynkup burom da pynkynmoo u wa u Dr. Ebormi Langshiang da man sakhiat u u bru uwa sñiawsuk uwa yarap kylliang, uwa em i mynsien krehlang ha kiwon kiwon ki liang ha ka imlang sahlang, kamtæ da kitbok kitrwiang u ya uni u khynroo yow nang ku u ha ki liang waroh.
U Simon Pyrtuh uwi na ki waheh ka kur hawa klam ha kani ka sngi da ong u yow yoh yei jop wei wow poi cha khlieh yong i naam ym toh iwa suk, du i kreh chitom wa i minot donhi wa ye wow pynpoi ya i cha khlieh dooh u loom yong i naam.
U Monjur Pyrtuh uwi na ki waheh wa e yei klam ha kani ka sngi da ong u kam ka kur sñiaw sarong ki wow yoh pynem burom ya kani ka sngi kawa khroo neibynta uni u khon khynroo uwa mih na u symbe yong ka kur Pyrtuh. Da ong u leh da man u u soh nyngkong wow yoh ya kani ka kyrdan hei puræ puthi kawa man ka burom wym toh du ya ka kur ka jait lane ya ka chnong ka thaw tangwa da man ko leh ka burom ya ka ri wa ya ka jaitbru hi waroh kawi. Chooh chooh da ong u wa kam ki bei ki pa toh wow pynchlur i ya ki khon ki kti yong i yow bood yei nongmuna u Dr. Ebormi Langshiang yow kreh chitom ki yow poi cha ka thong hawa im ha ki liang waroh.
Da pynphooh pynphieñ ya kani ka sngi da i rwai wa da rwai da ki khon khyllood yong ka kur Pyrtuh kiwa rwai sñiawngooh ya u Blai Kynrad wa da ri da sumaar u ya u Dr. Ebormi Langshiang hadooh wa poi u hadooh kani ka kyrdan.
Neiliang u Dr. Ebormi Langshiang hawa e yei klam da ong u wa wow poi chadooh kani ka kyrdan wym toh i kaam wa ke wei ym toh iwa suk, toh du dei kreh chitom wei i minot thop ha ki kaam wa ye u pynpoi ya i cha i naam jop. Da ong u leh teiñ teiñ sñiaw u kam wow ieh noh u ya ki kaam puræ tangwa uwa sikai yong oo da e mynsien u wow pyndep u ya ini i kaam. Da ong u leh wa ini waroh toh i kyrkhu u Blai Kynrad wa da ye u wow poi hadooh kani ka kyrdan yong i naam. Chooh chooh u Dr. Ebormi Langshiang da ong u hanla ym em de u pa u ha sla pyrthai leh wym jooh dooh mynsien u wei da kynmoo bait u ya iwa sneiñ u pa yong oo wa emkaam wow kreh chitom wow minot, emkaam wow man ki bru wa sñiaw khian yoh u pynheh u Blai ha ki liang waroh.
“Ini toh i kyrkhu yong u pa na kylla ki lyoh ki wym yoh wow yoo. Hanla da slem wym em de u pa ha sla pyrthai heipor wa dang puræ O wow yoh ya kani ka kyrdan, toh ka bei wa maya kawa pynkynmoo ya nga wym hoi u mylliñ ya ki ktien wa klam da u pa yong nga heipor wa dang em u ha sla pyrthai. Ka bei da man sakhiat ko kawa e mynsien ya nga kawa kyrchaan ya nga man-i-por hanla da em ka pli ha i kjut i saam ha kini ki sngi wa dadep,” da ong u Dr. Ebormi.
Da e khublei u leh ya ka kur Pyrtuh wow nang kyrchaan ki ya oo khamtam katni wa ka bei u leh wym em de ko ha sla pyrthai. Da ong u wa ha i im yong oo wym ye de u wow su kylliang ya i lehbha ka kur Pyrtuh ya oo wa ya ka yung ka sem yong oo. Kamtæ da kyrpaad u ya ki wow sñiawbha ki u duwai neibynta yong oo wa ya ka yung ka sem yong oo khnang wa ini i maya wow neh i yanom rata.
Da pynkut da i klam e khublei na u P. Pyrtuh uwa man u Secretary yong ka kur Pyrtuh Sohmynting.
Puræ leh: Yoh kyrdan PhD u Ebormi S. Langshiang
