Ka Kur Sookpoh 12 Wyrnai ha ka 9 tarik da pynman ko yaka Dorbar Yachemlang wa kyrpang ha yung kur wa em ha Chilliangraij, Jowai heiwa ki khon ka kur na kylleiñ ki chnong ki thaw da wan ki wow ya chimbynta.
Haka yalang yong kani ka sngi wa da pynlai da ka Jubanki Nikhla, u Vinolis Syngkon waka Eva Feona Gatphoh, neiliang ka Hima Lakiang, Chairperson WWO Kur Sookpoh da siang ko ki kyntien pynap Blai ap Syiem neitæ u Shape Paswet, Vice-President ka Kur Soo Kpoh 12 Wyrnai da e u ki kyntien yahkhmat yaka thong yong kani ka sngi, u Maryngkat Syngkon, General Secretary Kur Soo Kpoh 12 Wyrnai da klam pynsñiaw u yei krehkaam kyllum wa ki yurim pyrkhat ka Kur Soo Kpoh 12 Wyrnai katwa ka Malborene Nikhla, Secretary Education Committee hawa kut pachat ko ki kyntien sñiawngooh.
Chooh chooh wow khriñ yei pyrkhat pyrdaiñ ki khon ka kur ha kam kani ka sngi da em leh i klam i kappæ wa kyrpang hajrong ki mat ki phang waphær kiwa ong ‘I burom ki khon ka kur’ wa da klam da u Antonio Lakiang, Secretary Kur Sookpoh 12 Wyrnai, Shillong Branch neitæ ‘I mynsien maya kur ki waheh’ wa da klam da ka Kawan Kynjin, Advocate katwa u Puramon Kynjin, kam uwa yahkhmat ka Kur Sookpoh 12 Wyrnai uwa man leh u Pa Dolloi ka Elaka Jowai, e u ki kyntien sneiñ kyntien kroo wei e mynsien ya ki khon ka kur.
Da pynkyrpang leh ya kani ka sngi yachemlang da i pynkup burom ya ki waheh wasian, ki manbei ka kur kiwa da kynjooh 75 snem i rta neitæ i pynkup burom ya ki khon khynroo khyllood kiwa da poi chakhmat ha ki kyrdan puræ wapher nadooh kiwa pyndep yaka SSLC, HSSLC, Bachelor, Doctorate kamjooh leh i pynkup burom ya kitu kiwa da rah naam rah burom yaka kur ha ki rukom waphær.
Ki khon ka kur kiwa da yoh yeini i pynkup burom neibynta ka SSLC em ki le ngut wa kynthup yaka Hazelbelle Ivilianca Paswet na Panaliar, kawa da yoh 84%, ka Hakayooki Lytan na Panaliar kawa da yoh 83%, u Renny Nathan Siangbud, Shillong uwa da yoh 79% neitæ kiwa pyndep yaka Class 12 da em ki ar ngut wa kynthup ya u Wansame Pakyntein na Loomiongkjam uwa da yoh 87% waka Susana Bescy Siangbud kawa da yoh 81.6%.
Heiyatoh won wa kiwa pyndep ya ka kyrdan Bachelor em ki hadooh 7 ngut wa kynthup yaka Daia Lanong na Chilliangraij kawa da pyndep yaka B.Sc, Botony deiwa yoh 74.63%, ka Sakhiwanka Kynjin na Khimusniang kawa da pyndep yaka Bachelor of Arts haka Nutrition & Health Education deiwa yoh 83.35%, ka Idalana I Ka Lytan na Chutwakhu kawa da pyndep yaka Bachelor of Social Work deiwa yoh 70%, u Armanki Nikhla na Chilliangraij uwa da pyndep yaka B.Sc, Physics deiwa yoh 74.5%, u Hauru Pakyntein na Loomiongkjam uwa da pyndep yaka Bachelor of Social Forestry deiwa yoh 75.7%, ka Lapkibai Lakiang na Dulong kawa da pyndep yaka Bachelor of Science, Agriculture deiwa yoh 77.6% waka Vailan Kanni Lakiang na Dulong kawa da pyndep yaka Bachelor of Technology haka Biomedical Engineering deiwa yoh 84.7%.
Heiliang won kiwa da yoh Master Degree ka Kur Sookpoh ha uni u snem, da yoh u pynkup burom kamwa 3 ngut wa kynthup yaka Primadona Paswet na Panaliar kawa da pyndep yaka Master of Arts in Rural Development deiwa yoh 84%, ka Veralana V Syngkon na Chutwakhu kawa da pyndep yaka Master of Commerce deiwa yoh 81% waka Samhaka Lakiang na Dulong kawa da pyndep yaka Master of Science, Zoology deiwa yoh 85% katwa heiyatoh won wa ki kyrdan Doctorate da em du samen donhi katæ toh ka Dr. Mebalarisha Paswet na Khliehiongriang kawa da pyndep yaka PG Diploma ha ka Advance Clinical Research and Pharma Covigilance deiwa yoh 1st Class.
Chooh chooh ka Kur Sookpoh 12 Wyrnai da pynkup burom ko leh yaka Sawakani Lakiang na Tpep-Pale, u B. Desire Kynjing wa u Luckyman Kynjing kiwa man ki khon khynroo khyllood ka kur kiwa da rah naam rah burom ha ki yakob pynheh dohksah næ Body Building kiwa da pynman ha ki thaw waphær yong ka jylla kamjooh cha baar.
Discussion about this post