Ka Kur Sookpoh Khad-Ar Wyrnai, Jowai kawa kynthup ya kiwa boon ki jait kur, ha ka 14 tarik uni u bnai da pynman ko yei yachemlang wa chisien chisnem ki khon ka kur kamwa jooh leh khlieh u snem, wei ya kani ka yachemlang da pynman ha yung ka Kur Sookpoh Khad-Ar Wyrnai hi kawa em ha Chilliangraij, Jowai.
Neiliang ka kur ha kani ka sngi da pynkup burom ko ya ki khon ka kur kiwa poi chakhmat ha ki kyrdan puræ waphær waphær wa kynthup nadooh kiwa yoh yei naam Doctor, kiwa da yoh yei kyrdan Master, kiwa yoh Degree wa kiwa lehbha ha ka HSSLC wa SSLC kam chibynta wow pynchlur chooh chooh ya ki khon ka kur yow nang ku nangroi ki hei puræ puthi.
Ka Kur Sookpoh Khad-Ar Wyrnai da pynkup burom haroh ko ya ki President wa Secretary yong ki chnat waphær waphær kamjooh leh ya kiwa da palat 75 snem i rta kam ka dak burom da ka pateiñ wa katni yeiwa da yoh ki lyngba i chdooh i yahluti yong ki kiwa da heh rta.
Da yoh leh yei klam na u Dr. Tyrchaiñ Mitre Lipon wa na ka Dr. Mebalarisha H. Paswet kam kawi wa chah pynkupburom.
U President ka kur, u Puramon Kynjing uwa man leh u Dolloi ka Elaka Jowai hawa klam da khana u ya ka parom ka kur, wei da ong u ya ka chnong Jowai da seiñ da ka Kur Sookpoh lyngba ki 4 ngut chipayu ka Bon, ka Teiñ, ka Wet wa ka Doh.
Ong u leh ka Kur Sookpoh toh kawa sbun wa bha mynsien, wei nei joor i bha mynsiem wow e thaw sah ya kiwi ki jait, ka kur kamwa man katni ki khon ko boon kiwa sahwai ha Jowai.
Neitæ kyntu u leh ya ki khon ka kur wow man ki kiwa tipbru tipblai, ki wow syndong yei yatoh chi kur ha kawon kawon ka thaw, wei u yakrehlang neibynta i bha, deiwa yooluti leh wa i tip i stat hapoh ka kur u nang ku chooh chooh ki chakmat.
Chwa ini da yoh yei kyntien yahkhmat na u Shape Paswet, Vice President ka Kur, da yoh ya ka Report krehkaam ka kur na u General Secretary, u Marryngkat Syngkon, i klam na u Womlin Pakynteiñ, Executive Member ka Kur wa i ngooh Blai na u Valentidio Paswet, Asst. General Secretary.
Da pynchongchit haroh ya kani ka yachemlang dei rwai i chaad.
Discussion about this post