Ka Kur Sookpoh Khadar Wyrnai, Jowai kawa kynthup ya boon ki jait kur ha ka, ynne ka sngi haka dorbar kyrpang yong ka wada pynman ha yung kur ha Chiliangraij, da pynkup burom ko yaki manbei manpa ka kur kiwa da palat 75 snem i rta kam ka dak u burom da ka pateiñ wa katni wa iwa da yoh ki hadooh ynne ka sngi toh lyngba i chdooh i yah luti yong ki.
Kamwa da jooh leh ha man ka dorbar kur khlieh u snem, ha uni u snem leh ka Kur Sookpoh Khadar Wyrnai da pynkup burom haroh ko yaki khynroo khyllood wa poi chakhmat haki kyrdan puræ waphær waphær.
Chooh chooh da pynkup burom haroh ko yaki jait kur San Syngkong, kur Challam, kur Passah waka kur Shullai neibhah ki 4 ngut chipayu kiwa man ki beipun beili ka Kur Sookpoh Khadar Wyrnai wa kynthup yaka Bon, ka Teiñ, ka Wet waka Doh kiwa da poi chong kurim ki ha kini ki jait kur.
U President ka kur, u Puramon Kynjing uwa man leh u Dolloi ka Elaka Jowai hawa khana yaka parom ka kur, da ong u yaka chnong Jowai leh da seiñ da kini hi ki 4 ngut ki chipayu ka Bon, ka Teiñ, ka Wet waka Doh.
Wei kani ka kur em ko ka parom wa yakdoh heiyatoh u bru wa ki kaam Blai kamjooh wa ka kaam synchaar khadar kawa mut wa ka kur wym em chakri ko du kat u im ka kur tangwa ya ka imlang sahlang kamjooh.
Heipor wa sdang ka yung ka sem kini ki 4 ngut chipayu toh ka yung paidbah wei toh leh ka yung chong pyrkhat neibynta u pynlai ya kawon kawon ka kaam wa yatoh waka kaam niam.
Hawa kyntu u yaki khon khynroo khyllood u man ki kiwa tipbru tipblai haki kaam wa bha, yooluti u wa i tip i stat yong ki u nangku chooh chooh ki chaphrang.
“Wym myntoi wow yoh yei stat lym tip u pynemkam yaka, ym emkaam u ku hei kyrdan lym em por u chakri neibynta u pynbait yei duna chipayu wei yarap yaki khon ki kti,” ong u Puramon.
Najrong wa kyntu u wow syndong yei yatoh chi kur ha kawon kawon ka thaw, kyrpang haroh u wow e ngooh e dem hei duwai wym du hei ngait wa em, tangwa ha waroh ki jait ngait yow yoh ka jooh ka bor Blai u chakri haka pyrthai, wei u sdang tei nyngkong chwa leh na yung wei poi haka kur neitæ haka imlang sahlang.
Ha kani ka sngi da yoh leh ka Report krehkaam ka kur na u General Secretary ka kur, u Marryngkat Syngkon, da yoh i klam tbian na u Lamwan Paswet, General Secretary warim wa kiwi de wei da pynchongchit dei rwai i chaad.
