Ka Loomkyrwiang Dorbar Chnong Ñiamtre Committee ha ka sngi Hat 20 tarik uni u bnai hakhmat ka Dorbar Ya Syllok Behdeiñkhlam ka Seinraij Jowai, da pynman ko i pynkup burom ya ki waheh wasian ka dorbar chnong kiwa da yarap kyllooid mynsien wei man ki Chahtre yong u loom u pdeiñ heipor Behdieñkhlam.
Ya ini pynkupburom da leh ha ka yurim i sñiawngooh sñiawburom ya kini ki waheh wei i wow man leh ka dak sah kynmoo yei yi iwa da leh ki hapoh u loom u pdeiñ na ki snem cha ki snem neibynta i burom u Trekirot ha ki Soo Sngi Le Yaaw yong ka Chaad Ñiam Behdieñkhlam.
Ki waheh kiwa da yoh yeini i burom na ka Loomkyrwiang Dorbar Chnong Ñiamtre Committee ha kani ka sien toh u Chibor Najiar, u Poiwan Shullai, u Rishanki Shullai, u Dayoohi Oo Laloo, u Thiangmon Laloo, u Latmon Laloo, u Darapshngain Laloo wa u Damonbha Shullai.
Neiliang u S.D. Laloo, General Secretary Loomkyrwiang Dorbar Chnong hei klam e u i kitbok kitrwiang ya kini ki waheh wei ong u leh yooluti kam ini i pynkup burom daw pteiñ chooh i leh ha kiwi ki por lada ki khon ka chnong leh kreh ki ya iwon iwon i kaam iwa man neibynta i miat i bha ka imlang sahlang kamjooh neibynta i burom ka dorbar chnong.
Ha kani ka Dorbar Ya Syllok Behdieñkhlam ki khon ka dorbar chnong da yoh ki leh chiboon i myntoi lyngba i klam i kappæ ki waheh wa ka kchu ka siang chaphang ka Behdieñkhlam wa i kaamram watoh u leh ha ki Soo Sngi Le Yaaw da ka luti wow pynjanai chooh chooh yei man kyrpang kyntang ka niam ka rukom dustur riti katkam ki hukum adong u Trekirot yow Niawwasa.
Ki waheh kiwa da embynta ha kani ka Dorbar Ya Syllok Behdieñkhlam toh u Anthony Challam, u Dasajeki Rymbai, u C. Tympang Laloo, ka Dr. Wa I Sa Sumer kiwa da mihkhmat ya ka Ñiamtre Committee Seiñraij najrong ki dkhot ka dorbar chnong wa kynthup yow Wh. Lammat-Oo Laloo, Waheh Chnong wa u S.D. Laloo, General Secretary.
Discussion about this post