Ki Soo sngi Le Yaaw yong ka Chaad Ñiam Behdieñkhklam toh ka por ka samoi wow pynkhroo yei burom u Trekirot, ki Blai Ki Syiem wa ki Sangia Saret katkam ka yurim sikai niam wa da pynjooh na warim hapoh ka raij ka chnong.
Ha kam kani ka por ka samoi ki khon ka Ñiamtre najrong i pyndep ya ki kaam niam kaam blai nadooh na yung na sem hadooh ha raij ha chnong, man i leh i por wa khroo wa kyrpang tam wow saiñdur saiñdar yei longbru manbru da ka luti i maya, yatylli, ya burom kylliang wei yatoh yumut hapyrdi parabru iwa man ka spah wa khroo hakhmat ka duwan u Trekirot.
Kamtæ ka Dorbar Chnong Loomkyrwiang, ha ka yurim i sñiawngooh sñiawburom yow Sanbor Shullai, MLA wa yow A. Andrew Shullai, MDC-Jowai Central neibynta i yarap yachaan wei lehsbun lehbha yong ki ya ka dorbar chnong, ha ka sngi Pynsiñ 30 tarik Naiynru kam chibynta i lehkmen Behdieñkhlam da pynkup burom ya ki ha Yungwalieh hei sakhilang ki khon ka dorbar chnong.
Ha ka yalang wa tbian yong kani ka janmiet hei pynlai u Daioolang Pakma, Symbood Waheh Chnong da yoh i klam tbian yahkhmat na u Lammat-Oo Laloo, Waheh Chnong neitæ ki kyntien e mynsien ya ka Dorbar Chnong na u Sanbor Shullai wa na u A. Andrew Shullai.
Yeini i pynkup burom ya kini ki waheh da pyndep da u Lammat-Oo Laloo wa u Chibor Najiar, Adviser ka Loomkyrwiang Dorbar Chnong katwa hei pynkut da wan u S.D. Laloo, General Secretary uwa da yieñ wow siang u booh ki kyntien ngoohblai ngoohsyiem.
Discussion about this post