Ka Loompyrdi Iongpiah da pynman biang ko ya Ka Sngi Yachemlang wa kyrpang ki khon yong ka ha ka 22 tarik uni u bnai hadien le snem iwa da chah pynwit ha ka khlam ka dait ka COVID-19.
Ya kani ka yachem wa kyrpang da pynman hajrong ka yurim wow phyllu yumut para khon ka Loompyrdi Iongpiah heiwa kammon u ye u kyntu kynrong ya ka imlang sahlang waroh kawi.
U khynroo Dasmear Suwer wa ka khyllood Iwakani Challam da man ki kam kiwa pynlai bait ya ki sarin yong katai ka sngi.
Da em leh i e burom ya waroh ki khon ka chnong kiwa da wan chakhmat ha i puræ puthi yong ki ha ka yurim wow pynchlur ya kiwi wa lai puræ puthi, kamjooh leh da e burom ya kitu ki waheh ka chnong kiwa da khynjoh 70 snem i rta, wei heijooh i por da e burom leh ya kitu ki dkhot ka chnong kiwa thoh ya ki Drama ha ki Baamphalar wa ya kitu kiwa jooh thoh sur na ki por cha ki por ha ka yurim wow nang pynchlur ya kiwa boon walang neibynta wow ye u pynneh pynsah ya ka Dustur ka Riti wa da sikai da ki warim ha ka patieñ wa katni.
Ha katai ka sngi da yoh leh ya i klam phang na u Waheh Chnong ka Loompyrdi Iongpiah, u R.L. Bimee Suwer, heiwa da pynsñiaw u ya ki kaam kiwa da dep leh ka chnong wei kamjooh leh ya ki kaam kiwa da booh ha ka thong wow pyndep neibynta i bha i miat yong uwa boon wa lang. Neiliang yong oo da pynsñiaw u ya kiwa boon ki kaam kiwa ka chnong da leh ko neibynta uwi pa uwi wa kawi pa kawi ki khon ka chnong khlem pait chiliang wei da pynsñiaw u leh ya iyi i kaamram kam ki kiwa chong chnong heiwa kammon u ye i u kyntu kynrong ya ka imlang sahlang neibynta i bha i miat yong uwi pa uwi wa kawi pa kawi ki khon ka chnong.
Chooh chooh da yoh i klam na ka manbei, ka Riianom Passah kawa da e i klam heiyatoh i kaamram kam ki khon ka chnong, wei kamjooh leh kawa e i snieñ i kroo ya ki khynroo khyllood ka chnong heiwa kammon u em ki i kitkhlieh wow lai haka luti yong ka Tip Bru Tip Blai neibynta i bha i miat i rukom im yong ki samen samen, hei wow ye ki u e i kyrchaan ya ka yung ka sem kamjooh leh ya ka chnong, ka Raij ka Muluk hi waroh.
Neiliang yong ki waheh kiwa da dap 70 snem, da yoh ya ki kyntien burom na u G. Riang Pyrbot, wei neiliang kiwa thoh Drama/Sur da yoh ya ki kyntien burom na u K. Firstborn Laloo, katwa neiliang yong ki khynroo khyllood kiwa da yoh burom hei puræ puthi, da yoh ya ki kyntien burom na ka Dr. Sakani Donhi Kyndiah.
Yow pynphooh pynphieñ chooh chooh ya kani ka sngi da yoh ya i rwai pdiang sñiawbha na ka Seiñ Kynthai chirup wa ki dkhot chynrang ka chnong, kamjooh leh ki chaad na ki khon ka chnong.
Heijooh i por da pynkhle ya ki 10 tylli ki Prize Lucky Draw neibynta wow pynka’it pynkasar ya waroh kiwa wan cha kani ka yachem wa kyrpang,
Hadien waroh da yoh ya ki kyntien e khublei na u General Secretary ka chnong u Sienlangki Myrten.
Chwa wow poi cha wakut, da pynlait paidbah ya ki Ticket khle nasib namo ka ‘Bumper Lucky Draw 2023’ ka chnong ka wow pynkhle haka 23 tarik u Kmaichonglad (December) 2023 kam chibynta ka Fete 2023 yong ka chnong ka wow man ha ka 22 wa 23 tarik.
Ki Prize ha uni u snem man ki kamni: 1st Prize- ₹2,00,000, ka 2nd Prize- ₹1,00,000, ka 3rd Prize- ₹75,000 wa ki Consolation Prize 5 tylli- ₹5,000 kawi.
I dor yong ka Ticket toh ₹30 chi sla wei chi Book ₹300.
Neiliang u Secretary In-charge, u Leki Laloo da kyntu u ya waroh ki para chnong kamjooh leh ya ki lok ki jor kiwa jooh kyrchaan ya ka chnong wow yarap thied ki ya kini ki Ticket khnang wa ka chnong u nang ye ko u pyndep ya kiwa boon ki kaam wa bha yong ka.
Discussion about this post