Ka Meghalaya Cricket Association (MCA) da pynman ko ya ka yalang pynkup burom yow tipmit yei lehbha kiwa yalehke neibynta ka samoi 2021-22.
Ha kani ka yalang da wan wow chimbynta da u Captain warim ka liang yaleh Cricket ka India kamjooh u President ka Hyderabad Cricket Association, u Mohammad Azharuddin, ki heh ka MCA wa kiwi de kiwa da chah khut sñiawbha.
Ya kani ka pynkup burom da pynman ha State Convention Centre ynnin i miet hadien ka Final ka Senior Men Challengers Cup.
Ha kani ka miet da e khusnaam leh ya u Manish Sharma, u Abhishek Kumar, u Chirag Khurana, u Ajima Sangma, u Punit Singh Bisht, u Kevin Christopher wa u Purav Agarwal. Da leh warom leh ya u DB Ravi Teja yeiwa da leh u neibynta ka Cricket ha Meghalaya kam uwa yalehke Guest Professional ka jylla. U Teja da chong ngiah u naka yalehke Professional Cricket ha u bnai wa dadep hadien ka yalehke wa khaddooh ka Meghalaya ha ka Ranji Trophy ha uni u snem.
Da leh burom leh ya kiwa yalehke ka liang ka Meghalaya Senior Men kiwa da psiah hapoh ka kyrdan ‘Elite’ ka Ranji Trophy.
U Manish Sharma da yoh u le tylli ki khusnaam yeiwa yoh u 37 Wicket ha ka Cooch Behar wa Vinoo Mankad Trophy, da yoh u leh 10 Wicket ha kawi ka yalehke wa 5 Wicket soo sien.
U Guest Professional, Chirag Khurana da yoh u ar tylli ki khusnaam kawi toh yeiwa yoh 685 Run wa kynthup ya 5 tylli ki 50 Run wa kawi ka chispah Run wei da yoh u leh 15 Wicket ha ka Syed Mushtaq Ali, Vijay Hazare waka Ranji Trophy katwa kiwi ki khusnaam toh ya kiwa boon dooh ki 50 Run heiwa da yoh lang leh wa u Punit Singh Bisht.
Neiliang ki kynthai da yoh ka Ajima Sangma kawa yoh 13 Wicket haka Senior Women’s One Day Tournament.
Na kiwa dang khynroo da yoh khusnaam u Kevin Christopher (uwa da yoh 3 tylli ki chispah Run), u Purav Agarwal (uwa da yoh 5 Wicket soo sien) wa u Abhishek Kumar (uwa yoh 25 Wicket ha ka U-25 Men’s State Tournament wa ha ka Col CK Nayudu Trophy).
Neiliang u Azharuddin da e khublei wei da yaroh u ya kini kiwa yalehke yeiwa da ye ki wow leh deiwa ong wa toh u booh thong ki deiwa rap chaneiñ yow wanrah burom ya ka jylla wa ka yalehke kamjooh.
