Ki bor pait bor pynlai ka Meghalaya Bharat Scouts & Guides West Jaiñtia Hills District ha ka sngi Musiang 17 tarik Kmaichonglad da pynman ki ka yalang lehburom kyrpang ya ki Scouts Master wa ki Guides Captain kiwa da yoh ya ka District wa ka State Award yong u snem 2020-21.
Ha ka yalang wa tbian yong kani ka sngi hei pynlai ka S. Tariang, District Commissioner Guides da yoh i klam pdiang burom na ka Siami Shylla, District Organiser Guides, MBS&G West Jaiñtia Hills neitæ i rwai na ki Rangers yong ka Thomas Jones Synod College, Jowai.
U Ohiwot Laloo, District Secretary MBS&G West Jaintia Hills ha ka yalang da e u ki kyntien yahkhmat heiyatoh wa ka yurim krehkaam yong ka Bharat Scouts & Guides katwa u Octomewot Lamin, MDC JHADC kam uwi na ki dkhot wa da yoh yei pynkup burom ha kani ka sngi, da niawtang u wow kynmoo ya ki kaam yong oo ha ka Scouts-Guides Movement wei kiwa man i myntoi wakhroo yei longbru manbru yong oo.
Ki kyntien e mynsien kiwa u Octomewot Lamin pachat u hapyrdi ki dkhot ka Bharat Scouts and Guides toh kiwa ong u, to man ki nongmuna wabha ya kiwi ki bru wa chong chnong dei wow imsngi u pyndep yei kaamram katkam ki yurim yong ka Scouts-Guides iwa ong, ‘Service to God, Service to other and Service to Self’.
Ki Scouts Master wa ki Guides Captain kiwa da pynkup burom ha kani ka sngi toh u Ohiwot Laloo, ka Saramai Tariang kiwa da yoh ya ka Long Service Award 2021, u Hopeful Khongstia uwa da yoh ya ka Award Medal of Merit 2021, u Octomewot Lamin, Thanks Badge Award 2021, u Adiam U Bthuh wa ka Deigratia War kiwa da yoh ya ka Best Scouts Master & Best Guides Captain 2021, u Damanbha Niang uwa da yoh ya ka Appreciation Certificate neitæ ka C.D. Laloo wa u Richard B. Uriah kiwa da yoh ya ka State Teachers Award.
Chooh chooh ha kani ka sngi da pyndep leh ya ka Induction Ceremony neibynta ka District School Education Officer, West Jaiñtia Hills ka wow chimkti leh katni neini kam ka District Chief Commissioner, MBS&G West Jaintia Hills District.
Ka A. Syiem, District School Education Officer, West Jaiñtia Hills hawa klam e mynsien ya ki para dkhot ha kani ka sngi ong ko, to yaleh chooh chooh u kreh ha ka luti ka thong yong i miat i bha wei wow khutlang leh ya kiwi ki bru wow ya embynta wa kani ka seiñ kawa yieñ u e i chakri næ yarap ya ki parabru ha kiwa boon ki rukom.
