Ka Dorbar Chnong Mihmyntdu ha ka 25 tarik uni u bnai da pynkup burom ko ya ki khon ka chnong kiwa da poi chakhmat ha ka Result SSLC wa HSSLC yong uni u snem kiwa em 45 ngut waroh wei ya kani ka pynkup burom da tip kam ka 2nd Felicitation Award 2024 ha ka yalang wa da pynman ha Lumchyrmang, Mihmyntdu.
Ha kani ka yalang pynkup burom, u Wailadmiki Shylla, MLA ka Jowai da man u kam u kongsan, u Richard Uriah, Principal ka North Liberty Higher Secondary School Jowai kam u symbood kongsan hei emlang u Nominated MDC ka JHADC, u Octomewot Lamin, ki khon ka chnong chynrang wa kynthai, ki manbei manpa, kiwa yahkhmat ka chnong wa kiwa chah khut sñiawbha.
U Waheh Chnong ka Mihmyntdu, u Abul Phawa hawa e yei klam da pyntip haroh u wa ya kiwa poi chakhmat dooh haka SSLC wa HSSLC da e da ki Laptop katwa kiwa boon won da e daka song poisa.
U Richard Uriah kam u Principal yong ka skur North Liberty kawi na ka skur wa bna naam ha Ri-loom Jaiñtia, hawa e yei klam da ong u katwon dap u dei kmen wow yoo lada kiwi tawon ki skur leh ya ku lang ki hei puræ puthi.
Wei i pynkup burom wa kam kani ymtoh du kat u pynyoo rong hi-eh cha ka pyrthai, tangwa man ko leh ka nongmuna wa bha wa da yoo jngai da u waheh chnong khnang wa kiwi tawon ki khynroo khyllood wa lai puræ leh u bood ki.
Neiliang Wailadmiki Shylla hawa klam kam u kongsan ong u, ka juk katni toh ka juk yakob wa hap u yakhun dohyap wei toh u chimkhia yow man leh ki bru wa em ka thong hei im khnang yow yoh yei naam i burom.
Hawa khana leh ya ki luti wa oo da chim u heiyatoh wow kyntu kynrong yei puræ puthi hapoh ka Constituency Jowai, kyntu u ya kiwa yoh khusnaam wym hoi u sñiaw sarong ki, wei kiwa dooh leh wym hoi u dooh mynsien ki neibhah dang em ka laad ya ki chaphrang.
Da yoh leh i klam e mynsien na u Topper ka HSSLC, u Weibha Nongtdu Lakiang waka Topper SSLC ka Deimaialang Pasi.
Da pynchongchit chooh chooh ya kani ka sngi dei rwai i chaad.
Discussion about this post