Ka Nongtalang College, West Jaiñtia Hills District, ynne ka sngi da pynkup burom ko ya u Montri ka chnat Pure Puthi ka sorkar jylla, u Lahkmen Rymbui hajrong i embynta yong oo u prat luti yaka College nadooh i por wa man u kam u dkhot ka Governing Body kani ka College hadooh katni wa da man u kam u Montri sorkar.
Iwa pynkmen dooh ya ki bor pynlai kamjooh kiwa sikai ki wakreh kani ka College toh wa dei yarap u Lahkmen Rymbui ha kani ka kynti wa man u kam u Montri ka chnat Pure Puthi, da pynpsiah haroh u ya kani ka College hapoh ka People’s College Scheme wei kamwa 40 ngut wa kynthup ya kiwa sikai wa ki wakreh yong kani ka College da su tulop bait da ka sorkar.
Ha kani ka sngi neiliang ka College da pynkup burom haroh ko ya ki dkhot ka Governing Body ka College neibynta u snem 2018-2022 wa ya ki 15 ngut ki khynroo khyllood wa dapoi chakhmat haka Degree Exam yong ki wa kynthup leh ya kiwi wa yoh 1st Division haka Class-XII.
U Lahkmen Rymbui hawa e yei klam da pynsñiaw u yei lai luti yong oo nachwa chirup wa kiwi won ki dkhot neibynta i bha i miat kani ka College, wei boonsien maad ki yei eh hapyrdi i lai luti.
“Kam u bru wada yoo ya chiboon i eh i khoo nadooh ki por nachwa, katni won da man O uwi wa kmen tam wow yoo yei ku kani ka College lyngba i ya krehlang kiwa boon nadooh kiwa sikai, ki wakreh wa ki dkhot ka Governing Body wa u paidbah,” da ong u Lahkmen Rymbui.
Neitæ kam uwa da embynta nadooh wa sdang kani ka College wei lai luti leh chiboon i eh, khana u wa joo umkhmat u wei wymtip de u wow klam heipor wa pyntip ki ya oo wa daw chah pynkup burom u, tangwa sñiawthooh won u wa ki umkhmat yong oo ha katæ ka sngi man ki kam ki moolangnai wow neh yanom rata neibhah wa ka Nongtalang College da em ko haka thup yong ka People’s College ka sorkar jylla, i wow pynmyntoi ya ki khynroo khyllood wa lai puræ ka thaaiñ wa wan na ki manyung wa duna i yoh i laa.
Heijooh i por sñiawkmen haroh u wa da ye u wow pynyoh artylli ki Bus ha kani ka College neibhah yoo u yei saja kiwa hap yabeh na Dawki.
Da pynrap haroh u wa i yakrehlang chirup chirup, i burom kylliang toh kawa kongsan tam wa hap i u em yow ye u jop yeiwon iwon i thmu.
Hawa pyn-ehbok won yaki khynroo khyllood wada poi chakhmat haka Result, kyntu u ya ki wow nanglehbha chooh chooh neibhah wym pu em biang ko yaki ha kani ka juk yakob namo ka Competition.
Kiwi won wa e yei klam ha kani ka sngi kynthup ki ya u Principal ka Nongtalang College, u Dr. R.R. Kharkongor, u F. Syiem In-charge Principal warim, u Hatmin Lyngdoh Giri, President Governing Body wa ka Charity Ryngkhlem haka yalang wa pynlai da u Spaiñlinmi Lapasam.
Ha kani ka jooh ka sngi u Lahkmen Rymbui deilang ki dkhot ka Governing Body dalai li pait haroh ki ya ki yung (Building) thymme ka College kamjooh ya ka Hostel yong ki kynthai, wa i pynkhreh dang lai i chait chait chakhmat wei yooluti u leh ym slem de da yoh u wai noh.
